Abaı toıynda 10 jasar Alınur saýdany qyzdyryp júr

SEMEI.KAZINFORM - Abaı oblysynyń Abaı aýdanynda atap ótip jatqan «Abaı kúni» merekesinde qalyń jurttyń ortasynda sýsyn satqan bala kózimizge ottaı basyldy.

10 jasar Alınur Ómirtaev Semeı qalasyndaǵy nómir 5-shi gımnazııa mektebinde oqıdy. Byltyr ǵana «Abaı oqýlaryna» qatysqan ol uly aqyn óleńderiniń birshamasyn jatqa aıtady eken.

- Aǵama kómekteseıin dep keldim. Tańerteńnen adamdarǵa 10-shaqty sýsyn sattym, - deıdi ol.

Abaı toıy ótetindigi týraly 1 aı buryn estipti. Búgin osynda aǵasynan bólek, ata-anasy da kelgen. Kenezeleri kepken halyq Alınur usynǵan sýdy iship, shólderin qandyryp jatyr.

Bul bir jaǵynan Abaıdyń eńbekqorlyqqa shaqyrǵan óleńderin oqyǵan balanyń bilgeninen nátıje shyǵarýynyń kórinisi dep túısindik.

- Abaıdyń mezgilder týraly jazǵan óleńderi unaıdy. Sózderi erekshe. Odan keıin «Ǵylym tappaı maqtanba» óleńin jaqsy kóremin. Sonda ol maqtanshaqtyqtyń jaman ekenin aıtady. Maǵan synyptastarymnyń ishindegi maqtanshaqtar unamaıdy. Abaı adamdardy bilimge shaqyrǵan. Sol úshin kóp oqyp, bilimimdi arttyra bergim keledi, - deıdi Alınur Ómirtaev.

Eske salsaq, osyǵan deıin Abaı oblysyndaǵy «Abaı-Shákárim» kesenesi aýmaǵynda «Etno aýyl Jıdebaı» kesheni boı kóteretindigin jazǵanbyz.