Abaı teatrynda jańartylǵan ınteraktıvti mýzeı ashyldy
ASTANA. KAZINFORM — Balerına beınelengen sırek kartına Abaı teatrynyń mýzeıine berildi.
12 qyrkúıekte Abaı atyndaǵy Qazaq ulttyq opera jáne balet teatry 93-teatr maýsymynyń shymyldyǵyn Ábdijámil Nurpeıisovtiń «Qan men ter» roman-epopeıasynyń jelisi boıynsha qoıylǵan «AQBALA» ulttyq baletiniń premerasymen ashty.
Premera aldynda Abaı atyndaǵy teatrdyń jańartylǵan ınteraktıvti mýzeıiniń saltanatty ashylý rásimi ótti. Mýzeıdiń jańa formatynda teatr tarıhy men onyń kórnekti tulǵalary týraly aqparat ınteraktıvti sheshimder arqyly usynylyp, kelýshilerge teatrdyń shyǵarmashylyq murasymen zamanaýı formatta tanysýǵa múmkindik berildi.
Ashylý rásimine teatrdyń seriktesteri men metsenattary, sondaı-aq teatr tarıhynda ózindik orny bar Kúlásh Baıseıitova, Qurmanbek Jandarbekov, Shara Jıenqulova, Ahmet Jubanov jáne Dáýren Ábırovtiń týystary qatysty.
Mýzeıdiń qoryna Qazaqstandaǵy teatr-sýretshiler mektebiniń negizin qalaýshylardyń biri Vladımır Ivanovıch Kolodenkonyń sırek kezdesetin kartınasy da qosyldy. Balerına beınelengen týyndyny teatr hor ujymynyń ambassadory Zaýre Rozmat pen onyń anasy Razııa Janabaevna Esenbaeva mýzeıge syıǵa tartty.
Vladımır Kolodenkonyń shyǵarmashylyǵy Abaı atyndaǵy Qazaq ulttyq opera jáne balet teatrynyń tarıhymen tyǵyz baılanysty. Endi biregeı týyndy mýzeı qorynan laıyqty oryn alyp, teatrdyń baı tarıhy men urpaqtar sabaqtastyǵyn aıǵaqtaıtyn qundy jádigerlerdiń qataryn tolyqtyrdy.
Buǵan deıin Kazinform tilshisi Óskemendegi eski tehnıkalar qoıylǵan retro-mýzeıden fotoreportaj usyndy.
