Abaı shyǵarmashylyǵy ulttyq ádebıet pen mádenıettiń aýqymynan anaǵurlym asyp túsetin ǵajaıyp qubylys - Q.Toqaev
STANA. Maýsymnyń 19-y. QazAqparat /Marlan Jıembaı/ - Abaı shyǵarmashylyǵy ulttyq ádebıet pen mádenıettiń aýqymynan anaǵurlym asyp túsetin ǵajaıyp qubylys.
Bul pikirdi búgin elordada qazaqtyń uly aqyny ári oıshyly Abaı Qunanbaıulynyń eskertkishiniń ashylý rásiminde QR Parlamenti Senatynyń Tóraǵasy Qasym-Jomart Toqaev bildirdi.
«Biz elordamyz Astananyń mádenı jáne rýhanı qazynasyn eseleı túsetin, mánimen maǵynasy óte zor oqıǵanyń kýási bolyp turmyz. Bul halqymyzdyń bir týar uly perzenti dana Abaıǵa bas ıip, qurmet kórsetý ǵana emes, barlyq qazaqstandyqtardyń rýhyn kóteretin saltanatty kún. Ultymyzdyń rýhanı aǵartýshysy, halqyna máńgi óshpes mura qaldyryp, qazaq ádebıetin álemdik deńgeıde moıyndatqan, maıtalman klassıgimiz Abaıǵa taǵzym etý biz úshin asa joǵary mártebe. Kemeńgerlik pen danalyqtyń sımvoly Abaı Qunanbaıulyna elordamyzdyń tórinen qoıylǵan osy eskertkish búgingi eńsesi bıik, mereıi ústem, bereke-birligi jarasqan halqymyzdyń baıypty maqtanyshy bolmaq. Artyna ólmeıtuǵyn sóz qaldyrǵan Abaı shyǵarmashylyǵy ulttyq ádebıet pen mádenıettiń aýqymynan anaǵurlym asyp túsetin ǵajaıyp qubylys», dedi Q.Toqaev.
Sonymen birge Senat spıkeri óz sózinde Abaıdy qarańǵy túnek zamanda qalyń buqarany týra jolǵa túsýge shaqyrǵan halqymyzdyń rýhanı temir qazyǵy retinde atap ótti. Tóraǵanyń aıtýynsha, Abaıdyń asyl muraty halyq ıgiligi jáne el muraty boldy jáne ol eliniń jarqyn bolashaǵy úshin búkil sanaly ómirin arnap, myńmen jalǵyz alysty. Ol halqynyń muńyn joqtap, joǵaltqanyn jańǵyrtyp túgendedi. Abaıdyń zary da, muńy da eliniń birligi men berekesi boldy.
«Elbasymyz N.Nazarbaev Abaı týraly «halqyna qamqor, ultyna janashyr bolamyn dep júrip kúlli adamzattyq meıirban gýmanıstik óresine kóterildi» degen edi. Búgingi zor qýanyshty bólisýge jınalǵan qaýymnyń árqaısysy uly aqynnyń óleń shýmaqtaryn jatqa oqıtyny sózsiz. Óıtkeni biz Abaı arqyly ózimizdi bilgen, Abaı aryly ómirdi saraptaǵan, sol ǵulama oıshylymyz arqyly dúnıeni tanyǵan urpaqpyz», dedi óz sózinde Senat Tóraǵasy.
Bul oraıda birtýar aǵartýshynyń qudireti men danalyǵyna bas ııý, bizdiń ǵana emes keleshek urpaqtardyń da qasterli mindeti ekendigin de basa aıtty. «Qazaqstan dana Abaı armandaǵan bolashaqtyń naqty kórinisi», degen Q.Toqtaev Elbasy N.Nazarbaevtyń saıasatynyń arqasynda otanymyzda beıbit ómir ornap, halqymyz eren eńbekpen, tolaǵaı tabystarǵa qol jetkizip otyrǵandyǵyn da tilge tıek etti.
Óz sózin Uly Abaıdyń «Kóp shýyldaq ne tabar, bılemese bir Kemel. Berekeli bolsa el, jaǵasy jaıla ol bir kól. Berekeńdi qashyrma, el tynysh bolsa jaqsy sol», degen bir shýmaǵymen qorytqan Senat spıkeri «Táýelsiz elimizdiń kók baıraǵy bıikten jelbireı bersin aǵaıyn! Astananyń kelbetin kóriktendire túsetin Abaıdyń eńseli eskertkishiniń ashylýy qutty bolsyn!» dep aǵynan jaryldy.
