Abaı shyǵarmalarynyń nemis tilindegi jınaǵy jaryq kórdi
ASTANA. 21 jeltoqsan. QazAqparat /Jasulan Amanbaıuly/ - Búgin Astanada QR Ulttyq akademııalyq kitaphanasynda nemis tilindegi Abaıdyń óleńderi men «qara sózderi» toptastyrylǵan jınaǵynyń tusaýkeseri boldy.
Kitapty belgili qazaq jazýshysy, «Amanat» jýrnalynyń bas redaktory «Abaı» halyqaralyq klýbynyń prezıdenti, Búkilálemdik óner jáne mádenıet akademııasynyń akademıgi Rollan Seısenbaev tanystyrdy.
Jazýshy oqyrmandarmen kezdesýinde Abaıdyń shyǵarmalaryn nemis tiline aýdarý úlken qajyrly eńbekpen kelgendigin, ony basyp shyǵarýǵa 15 jyldan astam ýaqyt jumsalǵandyǵyn tilge tıek etti. «Bunda Leo Koshýt degen ataqty nemistiń aqyny, aýdarmashysy, Abaıdyń óleńderin tárjimalady. Bul jaqsy aýdarma. Abaıdyń taǵy bir sapaly aýdarmasy aǵylshyn tilinde jasaldy. Qazir biz úsh jyldan beri Japonııamen jumys isteımiz. Biraq Abaıdy olardyń tiline aýdarý qıyndyq týǵyzýda. Jarty álem ıspan tilinde sóıleıtindikten, eki jyl boldy osy tilge de tárjimalaýdy qolǵa alyp jatyrmyz»,-dep atap kórsetti ol.
Onyń aıtýynsha, Qazaqstandaǵy Germanııa jyly aıasynda basylǵan jınaqtyń taralymy ázirshe 1000 dana.
Kesh barysynda «Adasqan aıqaı», «Qashý» sııaqty pesalar men romandardyń avtory jınalǵan qaýymǵa 10 jyl qatarynan shyǵyp kele jatqan «Amanat» ádebı jýrnalynyń jumysyna da toqtaldy. Jýrnal 1999 jyldan Semeıde shyǵaryla bastady, sol qalada R.Seısenbaevtyń qatysýymen Abaıdyń halyqaralyq klýby ashylǵan bolatyn.
