Abaı shyǵarmalary ulttyq kodymyzdy bekite tústi – Qadyr Júsip

ATYRAÝ. QazAqparat –Ult ádebıetiniń qaınar kózine aınalǵan Abaıdyń shyǵarmalary ulttyq kodymyzdy bekite tústi. Bizdiń búgingi mindetimiz–danyshpan shyǵarmashylyǵyn tereńirek zerttep, jas urpaqtyń sanasyna sińirýge atsalysý. Atyraýlyq ǵalym, fılologııa ǵylymdarynyń doktry, professor Qadyr Júsip osyndaı pikirimen bólisti, dep habarlaıdy QazAqparat.

«Abaı ómir súrgen ǵasyr –óte aýyr zaman. Óıtkeni, HH ǵasyrdyń basynan bastap Abaıdyń shyǵarmashylyǵyna sol zamandaǵy bıliktiń kózqarasy ońdy bola qoımady. Abaı da qatty qyspaqqa ushyrady. «Onyń óleńderi de, qara sózderi de keńestik ıdeologııaǵa qarsy» degen pikirler jappaı beleń aldy. Tipti, bir kezderi Memlekettik syılyq alǵan Muhtar Áýezovtiń «Abaı joly» roman-epopeıasynyń ózi ótken ǵasyrdyń 60-ynshy jyldaryna deıin synnan kóz ashpaǵan edi. Solaqaı synshylar Abaı obrazy beınelengen shyǵarmany baıshyldyq, ústem tap ókilderin dáriptegen shyǵarma dep synap-minedi» deıdi ǵalym Qadyr Júsip.

Ǵalymnyń pikirine súıensek, qazir Abaıdyń shyǵarmashylyǵyna shynaıy, ońdy kózqaras qalyptasyp otyr.

«Bárinen de buryn ózimiz aıtyp júrgen ulttyq kodymyzdy Abaıdyń shyǵarmalary odan ári bekite túsedi. Bizdiń endigi mindetimiz – Abaıdyń shyǵarmashylyǵyn tereńirek zerdelep, ǵıbratty taǵylymyna nazar aýdarý. Al, uly aqynnyń bıylǵy 175 jyldyq mereıtoıy óleńderin jatqa aıtýmen shektelmeýi kerek. Onyń shyǵarmashylyǵy oqý oryndarynda endi, meılinshe tereńdetilip oqytylýy tıis. Osy oraıda buryn oqý baǵdarlamasynda «Abaıtaný páni» bolǵan edi. Endi osy pándi tolyqtyryp, mektepten bastap joǵary oqý oryndaryna qaıtadan engizý qajet» -deıdi professor Qadyr Júsip.

Eske sala ketelik, buǵan deıin Qoıshyǵul Jylqyshıev Abaıdy anyq bilý haqynda pikir bildirgen edi.