«Abaı salbýryny – 2026»: búrkit, qarshyǵa jáne ıtelgi salǵandar synǵa tústi
ASTANA. KAZINFORM — Abaı oblysynda «Abaı salbýryny – 2026» respýblıkalyq qusbegiler týrnıri ótti.
Abaı aýdanynyń Kókbaı aýylynda aqyn, Abaıdyń shákirti Kókbaı Janataıulynyń 165 jyldyq mereıtoıyna arnalǵan «Abaı salbýryny – 2026» respýblıkalyq qusbegiler týrnıri márege jetti. Eki kúnge sozylǵan ulttyq sport dodasyna elimizdiń 11 oblysy men 3 qalasynan 101 qusbegi qatysty.
13–14 qarasha kúnderi uıymdastyrylǵan týrnırde qusbegiler búrkit, qarshyǵa jáne ıtelgi salýdan ózara synǵa tústi. Sonymen qatar 20-dan astam qumaı tazynyń qatysýymen jarystar uıymdastyryldy. Ulttyq sport merekesi aıasynda arqan tartý, sadaq atý jáne taı kóterý saıystary da ótkizildi.
Byltyr Abaı Qunanbaıulynyń 180 jyldyq mereıtoıy aıasynda uıymdastyrylǵan respýblıkalyq týrnır bıyl Kókbaı Janataıulynyń 165 jyldyǵyna oraı jalǵasyn tapty. Dástúrli doda elimizdiń ár óńirinen kelgen qusbegilerdiń basyn qosyp, saıatshylyq ónerdi dáripteýge arnaldy.
Týrnır qorytyndysy boıynsha ıtelgi salýdan Aqmola oblysynyń ókili Erlan Kenjetaev jeńimpaz atandy. Ekinshi oryndy Qaraǵandy oblysynan kelgen Temiráli Tólegenuly ıelense, úshinshi oryndardy Qaraǵandy oblysynyń ókili Erdaýlet Tólegen men Jambyl oblysynyń qusbegisi Baqdaýlet Babajan bólisti.
Qarshyǵa salýdan Jambyl oblysynyń ókili Berikbolsyn Babajan birinshi orynǵa ıe boldy. Túrkistan oblysynan kelgen Zakı Mahmuthan ekinshi oryn alsa, Almaty oblysynyń ókili Saǵynysh Baetbaı men Qaraǵandy oblysynyń qusbegisi Serik Qarıpov úshinshi oryndardy ıelendi.
Búrkit salýdan Astana qalasynyń ókili Erasyl Serikbekuly jeńimpaz atandy. Ekinshi oryndy Shyǵys Qazaqstan oblysynan kelgen Baýyrjan Sembaev ıelendi. Al Qaraǵandy oblysynyń ókili Nurǵazy Qazybek pen Almaty qalasynan kelgen Arman Qoshqarov úshinshi oryndardy bólisti.
Qazaqy tazylar jarysynda Shyǵys Qazaqstan oblysynyń Óskemen qalasynan kelgen Erkebulan Ádilbekov jeńimpaz atandy. Ekinshi oryndy Abaı oblysy Jarma aýdanynyń ókili Serik Slatov, úshinshi oryndy Shyǵys Qazaqstan oblysy Tarbaǵataı aýdanynan kelgen Meıir Jetpisov ıelendi.
Ulttyq sport túrlerinen ótken saıystarda da úzdikter anyqtaldy. Sadaq atýdan Qaraýyl aýylynyń turǵyny Almas Qurmanov birinshi, Asqar Ábeýov ekinshi, Kókbaı aýylynyń ókili Abaı Tóleýbekov úshinshi oryn aldy.
Arqan tartýdan Kókbaı aýylynyń komandasy jeńiske jetti. Ekinshi oryndy Qaraýyl aýylynyń, úshinshi oryndy Qundyzdy aýylynyń komandalary ıelendi.
Qundyzdy aýylynyń turǵyny Álıhan Ádilov taı kóterý saıysynyń jeńimpazy atandy.
Buǵan deıin ShQO-daǵy aýyl turǵyny qusbegilik arqyly týrızmdi dáriptep júrgenin jazdyq.
