Abaı Quiz zııatkerlik oıyny elimizdiń rekordtar kitabyna enýi múmkin

ASTANA. KAZINFORM – Abaı Qunanbaıulynyń 180 jyldyq mereıtoıy qarsańynda aqynnyń týǵan ólkesi Semeıde birqatar aýqymdy is-shara uıymdastyrylyp jatyr. Tolyǵyraq Abaı oblysy Mádenıet basqarmasy basshysynyń orynbasary Baýyrjan Mustafın aıtyp berdi.

- Uly Abaıdyń 180 jyldyq mereıtoıy ulttyq aýqymdaǵy erekshe rýhanı, tarıhı oqıǵa bolyp otyr. Іs-sharaǵa 30 myńnan astam adam qatysady dep kútiledi. Onyń ishinde 15 elden sheteldik delegatsııa, ǵylymı jáne shyǵarmashylyq qaýym, óner ıeleri, jastar, týrıster men BAQ ókilderi bar. Abaı aýdanynda 200-den astam kıiz úı tigilip jatyr. Іs-sharalardy uıymdastyrýǵa júzdegen mádenıet qyzmetkeri, aspaz, tehnıka mamandary men 530 volonter atsalysyp jatyr, - dedi Baýyrjan Mustafın ortalyq kommýnıkatsııalar qyzmeti alańynda ótken baspasóz máslıhatynda. 

Aqyn týǵan ólkede 1-10 tamyz aralyǵynda 70-ten astam is-shara, 25 kontsert, 10 teatrlandyrylǵan qoıylym, 8 kórme-festıval, 5 sporttyq jarys ótip jatyr. 

- Abaıdyń 180 jyldyq mereıtoıyna arnalǵan is-sharalar onkúndik retinde atalyp ótilip jatyr. 1 tamyzda «Abaı akademııasy» atty entsıklopedııalyq portal iske qosyldy, Abaı murasyna tsıfrlyq keńistikte jol ashyldy. Semeıde ulttyq óner men salt-dástúrdi dáripteıtin etnoaýyl qalashyǵy ashyldy. Sýretshi Ańsaǵan Mustafanyń «»Kóńilge túrli oı salar» atty kórmesi, «Asyl mura» atty festıval, «Adamzattyń alyby – Hákim Abaı» mereıtoılyq kontserti ótti. 2-3 tamyz kúnderi Túrkistan oblysynyń mádenı kúnderi aıasynda aýyl sharýashylyǵy ónimderiniń jármeńkesi, qolóner sheberleriniń kórmesi jáne ónerpazdar kontserti uıymdastyryldy.

Semeıge Túrkistan óńirinen 540 tonnadan astam ónim jetkizildi. 1 myńnan astam adam qatysqan «Abaı Quiz» degen ataýmen respýblıkalyq zııatkerlik oıyny ótti. Erekshe formattaǵy ıntellektýaldy jobany Qazaqstannyń rekordtar kitabyna usynylyp otyr, - deıdi ol. 

Sondaı-aq óńirlik mádenıet basqarmasy basshysynyń orynbasary Semeıde zaǵıp jáne kórý qabileti nashar jandarǵa arnalǵan kitaphana ashylǵanyn aıtty. 

Buǵan deıin aqyn Abaı Qunanbaıulynyń 180 jyldyǵyna oraı elordada josparlanǵan is-sharalardy tizip shyqqan edik.

Búgin Semeıde Abaıdyń 180 jyldyǵyna oraı respýblıkalyq aqyndar aıtysy ótip jatyr.