Abaı polıtsııasy jol qozǵalysyn drondardyń kómegimen qadaǵalaıdy
ASTANA. KAZINFORM — Drondar júrgizýshilerdiń qarama-qarsy jolaqqa shyǵý, jyldamdyqty arttyrý syndy quqyq buzýshylyqtaryn der kezinde anyqtaýǵa múmkindik beredi, dep habarlaıdy Іshki ister mınıstrliginiń baspasóz qyzmeti.
Abaı oblysynda jol qozǵalysy qaýipsizdigin qamtamasyz etý jáne jol-kólik oqıǵalarynyń aldyn alý maqsatynda polıtsııa qyzmetkerleri avtojoldardaǵy jaǵdaıdy qadaǵalaý úshin zamanaýı bespılottyq ushý apparattaryn keńinen qoldanyp jatyr.
Bıylǵy jyldyń alǵashqy segiz aıynyń qorytyndysy boıynsha óńirde jol-kólik oqıǵalarynyń sany 4,6%-ǵa (668-den 637-ge deıin) azaıdy. Jol apatynan qaza tapqandar sany da 16,4%-ǵa (50-den 42-ge deıin) tómendedi. Degenmen, jaraqat alǵandar sany 3,6%-ǵa (951-den 985-ke deıin) sál artqan.
Jol-kólik oqıǵalarynyń basym bóligi — 79%-y nemese 428 derek eldi mekender aýmaǵynda tirkelgen. Apattardyń negizgi sebepteri — jyldamdyq rejımin buzý (106 derek nemese 19%) jáne rettelmeıtin jaıaý júrginshiler ótkelderinen ótý erejesin saqtamaý (99 derek nemese 18%). Jıi kezdesetin apat túrleri: kólikterdiń soqtyǵysýy (37% nemese 202 jaǵdaı) jáne jaıaý júrginshilerdi qaǵý (33% nemese 178 jaǵdaı).
— Jol-kólik oqıǵalarynyń aldyn alý úshin patrýldik polıtsııa qyzmetkerleri «Quqyqtyq tártip» jedel-profılaktıkalyq is-sharasy aıasynda qaýipti ýchaskelerde reıdter júrgizip keledi. Sonymen qatar júrgizýshilerge jol qozǵalysy erejelerin saqtaý, eńbek jáne demalys rejımin buzbaý qajettigi jóninde túsindirý jumystary júrgizilip jatyr. Budan bólek, jasyryn patrýldeý ádisteri qoldanylyp, drondar arqyly zań buzýshylyqtar der kezinde anyqtalýda, — delingen vedomstvo habarlamasynda.
Abaı oblysynyń polıtsııa departamenti jol qozǵalysyna qatysýshylardy saqtyq sharalaryn qatań ustanýǵa jáne zań talaptaryn buljytpaı oryndaýǵa shaqyrady.
Budan buryn Abaı oblysynda jyl basynan beri qos azamattyq úshin 15 adam jaýapqa tartylǵanyn jazǵan edik.