Abaı polıtsııasy drondardyń kómegimen Alakól tasjolynda baqylaýdy kúsheıtti
ASTANA. KAZINFORM — Abaı oblysy aýmaǵynda Alakól kólinde týrıstik maýsymynyń bastalýyna baılanysty jol qozǵalysy qarqynynyń artýy baıqalady, dep habarlaıdy oblystyq PD baspasóz qyzmeti.
Osyǵan oraı, óńirge kelýshiler leginiń kóbeıýi Maqanshy–Jalańashkól avtojolynyń júktemesin edáýir kúsheıtip, jol qaýipsizdigin qamtamasyz etý máselesiniń mańyzdylyǵyn arttyryp otyr. Osy jaǵdaıda Abaı oblysy Polıtsııa departamentiniń qyzmetkerleri jol qaýipsizdigin qamtamasyz etýdegi erekshe ról atqaryp jatyr.
Polıtsııa tarapynan jol-kólik oqıǵalarynyń aldyn alý, quqyqbuzýshylyqtardy der kezinde anyqtaý jáne kólik qozǵalysyn turaqty baqylaýda ustaý maqsatynda zamanaýı tsıfrlyq tehnologııalar keńinen qoldanylady. Sonyń ishinde áýeden baqylaý júrgizýge arnalǵan ushqyshsyz ushý apparattary (drondar) tıimdi paıdalanylady. Polıtsııa qyzmetkerleri júrgizip otyrǵan áýeden baqylaý barysynda qarsy qozǵalys jolaǵyna shyǵý, belgilengen jyldamdyq rejımin buzý, qaýipti manevrler jasaý jáne ózge de jol qozǵalysy erejelerin saqtamaý derekteriniń joly kesiledi. Mundaı quqyqbuzýshylyqtar tek júrgizýshiniń ǵana emes, jolaýshylar men barlyq jol qozǵalysyna qatysýshylardyń ómiri men qaýipsizdigine tikeleı qaýip tóndiredi. Osy oraıda Maqanshy aýdandyq polıtsııa bóliminiń bastyǵy polıtsııa podpolkovnıgi Ádil Kovnasharov júrgizýshilerge úndeý jasap, joldaǵy tártiptiń mańyzdylyǵyn erekshe atap ótti.
— Jol qozǵalysy erejelerin saqtaý — árbir júrgizýshiniń mindeti. Alakól baǵytyndaǵy kólik aǵynynyń kóbeıýine baılanysty biz kúsheıtilgen rejımde jumys istep, quqyq buzýshylyqtardyń aldyn alý úshin barlyq qajetti sharalardy qabyldap otyrmyz. Árbir júrgizýshi óz ómiri men ózgeniń qaýipsizdigine jaýapty ekenin umytpaýy tıis, — dedi polıtsııa podpolkovnıgi.
Abaı oblysy PD jol — joǵary tártip pen jaýapkershilikti talap etetin ortaq keńistik ekenin atap ótti. Bul baǵytta polıtsııa qyzmetkerleri tarapynan júrgizilip jatqan baqylaý men profılaktıkalyq sharalar joldaǵy qaýipsizdikti qamtamasyz etýdiń basty tetigi bolyp otyr. Belgilengen jyldamdyq rejımin saqtaý, qaýipti manevrlerden bas tartý jáne jolda muqııat bolý — árbir azamattyń mindeti. Ár sapardyń qaýipsizdigi polıtsııanyń baqylaý sharalarymen qatar, júrgizýshilerdiń jeke jaýapkershiligine de tikeleı baılanysty.
Buǵan deıin Alakólde polıtsııa maıory birneshe týrıstiń ómirin qutqaryp qalǵanyn jazǵan edik.
