Abaı polıtsııa bóliminiń ákimshilik ǵımaraty paıdalanýǵa berildi
ORAL. KAZINFORM — Búgin Abaı polıtsııa bóliminiń ákimshilik ǵımaraty paıdalanýǵa berildi. Saltanatty is-sharaǵa oblys ákimi Narıman Tóreǵalıev qatysty.
Aımaq basshysy «Zań men tártip» qaǵıdatyn ilgeriletý jolynda quzyrly qurylymnyń qyzmeti erekshe ekenin atap ótti. Búginde óńirdiń ishki ister organdarynda 2 myńnan astam adam eńbek etedi. Olar qoǵamdyq tártipti qyraǵy qadaǵalap, azamattardyń qaýipsizdigin qamtamasyz etip keledi.
— Keıingi 3 jylda salany materıaldyq-tehnıkalyq jaraqtandyrý maqsatynda oblystyq bıýdjetten 7,2 mlrd teńge bólindi. 400-deı qyzmettik avtokólik satyp alyndy. Barlyq aýdanda jedel basqarý ortalyqtary quryldy. 2024-2025 jyldary 742 mln teńgege 400 beınebaqylaý kamerasy alynsa, bıyl da bul maqsatqa 136 mln teńge qarajat qarastyryldy. Budan bólek kompıýter, planshet, mobıldi avtomatty júıeler satyp alynyp, polıtsııa bólimderi ǵımarattaryna aǵymdaǵy jáne kúrdeli jóndeý jumystary júrgizildi. Búgin Abaı polıtsııa bólimi ákimshilik ǵımaratynyń qoldanysqa berilýi — jergilikti atqarýshy organnyń qoldaýymen iske asyrylǵan nátıjeli jumystardyń jarqyn kórinisi, — dedi Narıman Tóreǵalıev.
Aımaq basshysy oblystyq polıtsııa departamentiniń bastyǵy Arman Orazalıevpen birge 3 qabatty nysandy aralap kórdi.
Osyǵan deıingi ǵımarattyń jaı-kúıi tıisti talaptarǵa saı emes edi. Endi irgeli ujym jaryq ári jaıly bólmelerde jumysyn jalǵastyrady.
Munda beınebaqylaý kameralary ornatylyp, múgedektigi bar azamattardy qabyldaý múmkindikteri qarastyrylǵan. Narıman Tóreǵalıev tártip saqshylaryna sáttilik tilep, qyzmet sapasyn arttyra túsetinine senim bildirdi.
