Abaı polıtseıleri 405 kólikten turatyn kolonnany eldi mekenderge jetkizdi

ASTANA. KAZINFORM — Abaı oblysynda polıtseıler avtokólikterdiń uıymdasqan qozǵalysyn qamtamasyz etti, dep habarlaıdy oblystyq PD baspasóz qyzmeti.

Abaı oblysynda kúrdeli jol jaǵdaıynda polıtsııa qyzmetkerleri negizgi baǵyttar boıynsha avtokólik quraldarynyń uıymdasqan túrde ótkizilýin qamtamasyz etip jatyr.

Qalbataý — Aıagóz / Aıagóz — Qalbataý baǵyttary boıynsha eki baǵytta 405 avtokóliktiń qozǵalysy baqylaýmen júzege asyryldy. Onyń ishinde 261 júk kóligi, 3 avtobýs jáne 141 jeńil avtokólik bar.

Sonymen qatar Qalbataý — Aıagóz baǵyty boıynsha 129 jeńil avtokólikke bir rettik ótkizý uıymdastyryldy.

Budan bólek Qalbataý — Kókpekti / Kókpekti — Qalbataý baǵyttary boıynsha avtokolonnalardyń qozǵalysy qamtamasyz etildi. Kókpekti eldi mekeninen Qalbataý baǵytyna qaraı 129 avtokólikten turatyn kolonna jolǵa shyqty. Onyń ishinde 106 jeńil kólik, 16 júk kóligi jáne 7 «Gazel» tıpti avtokólik bar. Al Qalbataýdan Kókpekti baǵytyna qaraı 38 kólikten quralǵan avtokolonna shyǵaryldy. Onyń quramynda 22 jeńil kólik, 14 júk kóligi jáne 2 «Gazel» boldy. 

— Qozǵalys arnaıy jol tehnıkasynyń súıemeldeýimen júzege asyryldy. Avtokolonnalardyń qozǵalysy polıtsııa qyzmetkerleriniń baqylaýymen, qaýipsizdik talaptaryn qatań saqtaı otyryp júrgizildi. Qazirgi ýaqytta polıtsııa jol jaǵdaıyn turaqty baqylaýda ustap otyr jáne júrgizýshilerdi aýa raıy jaǵdaılaryn eskerýge, polıtsııa qyzmetkerleriniń talaptaryn oryndaýǵa, sondaı-aq shekteýler engizilgen kezeńde alys jolǵa shyqpaýǵa shaqyrady, — delingen habarlamada.

Osyǵan deıin Abaı oblysynyń polıtseıleri 100-den astam kólikten turatyn avtotizbekke jol kórsetkenin jazǵanbyz.