Abaı poezııasyna degen ǵashyqtyǵym qazir burynǵydan artpasa, esh kemigen joq - Marfýǵa Aıtqojına
MATY. 10 tamyz. QazAqparat /Erlik Erjanuly/ - «Men uly Abaıǵa tabynýshylardyń birimin». Ony Memlekettik syılyqtyń ıegeri, aqyn Marfýǵa Aıtqojına búgin Abaı poezııasynyń kúnine oraı QazAqparat tilshisine bergen suhbatynda aıtty.
«Adamnyń ishki úni bolady. Ol sulý bolý kerek. Halyqtyń júregine kóp nárse jete bermeıdi. Oıyn naq basyp, aıta almaı, jetkize almaı júrgen nársesin sen poezııa tilimen jetkizip berýiń kerek. Sonda ǵana qunyń artyq bolyp, halyqqa qadirli bolasyń. Abaıdy meniń jaqsy kóretinim sodan. Aqyn poezııasyna degen ǵashyqtyǵym qazir burynǵydan artpasa, esh kemigen joq», - deıdi Marfýǵa Ǵalıqyzy.
Onyń aıtýynsha, Abaı qaısy taqyrypty jyrlasa da júrekten qozǵap júrekke jetkizedi. «Ǵashyqtyń tili - tilsiz til» deıdi. Bul adamnyń ishki tolǵanysyn júregimen, sezimimen, kózimen, búkil bolmysymen jetkizýi. Ony áli kúnge deıin eshkim dál osylaı jetkize alǵan joq. Sondyqtan da Abaıdyń aqyndyq mektebi men shyǵarmashylyq álemi áli kúnge deıin búkil jurtty ózine tánti etýde. Onyń qupııasy men syryn ashýǵa barlyq adam ińkár. Alaıda ol ýaqyt ótken saıyn burynǵydan da tereńdep, túpsiz tuńǵıyqqa jeteleýde. Bul eldiń muńyn muńdap, jyryn jyrlaı alǵan adamnyń sózi eshqashan tozbaıtynyn, qaıta ýaqyt ótken saıyn saf altyndaı jarqyrap, aınalasyna jaryq sáýlesin burynǵydan da kóbirek shasha alatynynyń naqty aıǵaǵy.
