«Abaı orys qoǵamyna oı saldy» - respýblıkalyq basylymdarǵa sholý
***
«Egemen Qazaqstan» gazetiniń jazýynsha, Máskeýde Qazaqstan Respýblıkasynyń Prezıdenti Nursultan Nazarbaevtyń qatysýymen Táýelsiz Memleketter Dostastyǵyna múshe elder memleket basshylarynyń beıresmı sammıti bolyp ótti. Onda TMD aıasyndaǵy kópqyrly yntymaqtastyqty odan ári damytýdyń perspektıvalary talqylandy. Mundaı ustanym TMD-ǵa qatysýshy elder memleket basshylarynyń beıresmı kezdesýi kezinde aıqyn ańǵaryldy. Budan buryn habarlaǵandaı, seısenbi kúni keshke Elbasy Nursultan Nazarbaev Kremlde UQShU sessııasy aıaqtalǵan soń Reseı Federatsııasynyń jańadan saılanǵan Prezıdenti Vladımır Pýtınmen kezdesip, kelissóz júrgizdi. Barlyq máselede birtekti ustanymy bar memleket basshylarynyń kezdesýi tolyq túsinistik jáne dostyq ahýalynda ótkenin atap kórsetý kerek. «Men ekijaqty qarym-qatynastyń qandaı deńgeıde ekenin aıtýdyń ózin artyq sanaımyn. Siz - postkeńestik kezeńdegi ıntegratsııalyq úderisterdiń kóshbasshysysyz. Sonyń ishinde EýrAzEQ pen Keden odaǵynyń jáne bolashaq Eýrazııalyq odaqtyń bir avtorysyz. Osydan birneshe jyl buryn Qazaqstan Premer-Mınıstri osynda bolǵan bir jıynǵa Keden odaǵyn qurýdyń qajettiligi aıtylǵan Sizdiń joldaýyńyzdy ákelgen edi. Biz dál sol joldy qalap, búgingi kúni onyń iske asqanyna qýanyshtymyz. Men Sizdi kórgenime shyn júrekten qýanyshty ekenimdi aıta alamyn. Bolashaqta da biz osyndaı túsinistikpen eńbek etermiz degen úmittemin», - dedi Reseı Federatsııasynyń Prezıdenti Vladımır Pýtın kezdesý kezinde. Maqala basylymnyń búgingi sanynda «Dostastyq áleýeti áli de joǵary» degen taqyryppen berildi.
«Egemen Qazaqstan» basylymy búgingi sanynda «Bala asyrap alýǵa baıqap baratyn boldy» atty maqala jarııalap, úlken másele kóterdi. Basylymnyń jazýynsha, jetim balalar, olardyń arasynda ata-anasynyń qamqorlyǵynsyz qalǵan tiri jetimder de bar, arnaıy mekemelerde tárbıelenýde. Qazirgi olardyń sany 37 myńǵa jýyqtaıdy. Bul balalardy óz azamattarymyz ben sheteldikterdiń asyrap alýy qoǵamdaǵy eń bir kúıip turǵan másele desek, jýyrda elordadaǵy «Pekın Palas» qonaqúıinde ótken dóńgelek ústel týra osy jaǵdaıǵa arnaldy. Bilim jáne ǵylym mınıstrligi men BUU Balalar qory (ıÝNISEF) uıymdastyrǵan osy basqosýǵa eldegi basqa da mınıstrlikter men Joǵarǵy sot, Bas prokýratýra, Astana jáne Almaty qalalarynyń ıývenaldy sottary, sábıler úıleriniń basshylary qatysty. «Jetim kórseń jebeı júr» deıtin azamattarymyz jetim balalardy negizinen jaqsy nıetpen asyrap alady. Biraq olardy asyrap alýda qujattyq áýreshilikter men áleýmettik kedergiler áli de kóp. Búginde jetim balalardy negizinen orta dáýletti otbasylar asyrap alady eken. Al aýqatty otbasylardyń ol balalardy asyrap alý faktisi bes paıyzdy ǵana quraıdy.
***
«Aıqyn» basylymynyń búgingi sanynda «Abaı orys qoǵamyna oı saldy» atty maqala jarııalandy. Basylymnyń jazýynsha, Abaı Máskeýde tanymdylyq jaǵynan barlyq rekordqa jetti. Onyń kitaptaryn býkınısterden tabý - erekshe sáttilik. Internette onyń shyǵarmalaryn kóshirip alý boıynsha bıznes boı kóterýde. Reseılik «Alpına non-fıkshn» baspasy Abaı Qunanbaevtyń óleńder jınaǵyn jaryqqa shyǵarmaqshy. Sarapshylar bul qubylystyń san qyrly ekedigin paıymdaıdy.
Osy basylym betinde jarııalanǵan «Qundy qaǵazdan qur qalmańyz» atty maqalada Memleket basshysynyń bastamasymen qolǵa alynǵan halyqtyq IPO baǵdarlamasyn júzege asyryp, ony buqara halyqtyń keń qoldaýyna ıe qylý úshin aqparattyq jumysqa basymdyq berý kerektigi aıtylǵan. Sebebi, qarapaıym halyq IPO baǵdarlamasyn tolyq túsinip bolǵan joq. «Respýblıkalyq hám aımaqtyq BAQ baǵdarlamany kún qurǵatpaı nasıhattap jatsa da, «Bul ne degen batpan quıryq?» degen saýalǵa bas qatyryp júrgen jandar barshylyq»,-delingen basylymda
***
Reseı ózinde qazaqstandyq áskerı mamandardy oqytqany úshin Qazaqstannan eshqandaı qarajat talap etpeıtin bolady. Al Qazaqstan onyń esesine elimizdiń birqatar synaq polıgondaryn, jaýyngerlik alańdardy teriskeıdegi kórshige tegin berip, olardan da paıdalanǵany úshin esh aqy almaıdy. Keshe Májilis eki el arasyndaǵy osyndaı «esep aıyrysýdyń» erekshe túrin qamtıtyn kelisimdi maquldady. Bul jaıynda tolyq bilgińiz kelse «Alash aınasy» basylymyndaǵy «Áskerı saladaǵy «esep aıyrysýdyń» erekshe túri» atty maqalany oqyńyz.
Sondaı-aq osy basylymnyń jazýynsha, keshe Astanada alǵash ret zańgerlerdiń respýblıkalyq sezi ótti. Oıdaǵy-qyrdaǵy zańgerlerdiń basyn qosqan sezdiń basty nátıjesi «Qazaqstan zańgerler odaǵyn» qurý týraly usynystyń qabyldanǵany boldy. Odaqtyń tóraǵasy bolyp Parlament Májilisiniń depýtaty Rahmet Muqashev saılandy. Daýys berý arqyly uıymnyń jarǵysy qabyldandy. Bul jaıly «Alash aınasy» gazetiniń búgingi sanyndaǵy «Qazaqstan zańgerleriniń odaǵy quryldy» atty maqaladan bilýge bolady.
***
«Kazahstanskaıa pravda» basylymynyń jazýynsha, keshe Parlament Senatynyń Tóraǵasy Qaırat Mámı AQSh-tyń Qazaqstandaǵy Tótenshe jáne Ókiletti Elshisi Kennet Feırfaksti qabyldady. Kezdesý barysynda Qazaqstan men AQSh-tyń ekijaqty qatynastaryn odan ári nyǵaıtý máseleleri boıynsha pikir almasyldy. Júzdesý barysynda Senat spıkeri Q.Mámı Qazaqstan men AQSh-ty ózara is-qımyldyń aýqymdy salalaryn qamtıtyn strategııalyq áriptestik baılanystyratynyn atap ótti. Bul rette Tóraǵa jahandyq qarjy-ekonomıkalyq daǵdarys elder arasyndaǵy ózara saýda qarqynyna áser etpegenine de toqtaldy. Eki eldiń qarym-qatynasy boıynsha bolǵan kezdesýi «Kazahstanskaıa pravda» basylymynda «Svıdetelstvo tolerantnostı» atty taqyryppen basyldy.
