«Abaı» operasy tuńǵysh ret Italııada qoıylady

«Astana Opera» teatry Italııaǵa gastroldik saparmen barady. Ujym 8 jáne 10 qarasha kúnderi ataqty genýıalyq «Karlo Felıche» teatrynyń sahnasynda óner kórsetedi. Kórermenniń nazaryna A.Jubanov pen L.Hamıdıdiń «Abaı» operasy, sonymen qatar L.V.Bethovenniń №9 Sımfonııasy usynylady. Gastrol QR Mádenıet jáne sport mınıstrliginiń qoldaýymen «Rýhanı jańǵyrý» baǵdarlamasy aıasynda ótedi.

Dırıjerlik pýlt basynda - QR eńbek sińirgen qaıratkeri, «Astana Opera» teatrynyń bas dırıjeri, álemge áıgili maestro Alan Bóribaev.

«Abaı» operalyq spektaklinde basty partııany oryndaýshylar: Abaı - Qazaqstannyń eńbek sińirgen qaıratkerleri Súndet Baıǵojın, Janat Shybyqbaev; Ajar - Qazaqstannyń eńbek sińirgen ártisi, QR memlekettik syılyǵynyń laýreaty Maıra Muhamedqyzy, Qazaqstannyń eńbek sińirgen ártisi Jannat Baqtaı, Aıdar - halyqaralyq baıqaýlardyń laýreaty Meıir Baınesh, Qazaqstannyń eńbek sińirgen qaıratkeri Nurlan Bekmuhambetov; Ázim - Beıimbet Tańaryqov, Ramzat Balakıshıev; Jırenshe - Evgenıı Chaınıkov, Qazybek Dosmuhambetov; Qarlyǵash - halyqaralyq baıqaýlardyń laýreattary Tatıana Vıtsınskaıa, Malıka Mınızını; Kókbaı - Talǵat Ǵaleev, Erjan Saıpov; Syrttan - Armenııanyń Halyq ártisi Barseg Týmanıan, Bolat Esimhanov; Narymbet - Ramzat Balakıshıev, Erýlan Kámel; Mes - Shyńǵys Rasylhan, Haıdar Mustapın.

Qazirgi zamannyń ataqty stsenografy Etsıo Frıdjerıo men kostıýmder boıynsha sýretshi - «Oskar» syılyǵynyń laýreaty Franka Skýarchapınonyń keremet úılesken shyǵarmashylyq jubynyń operany jasaý boıynsha atqarǵan jumysyna kórermenniń beı-jaı qalmaıtyny anyq. Biregeı stsenografııa aqynnyń ishki jan-dúnıesin ashqandaı: ıtalııalyq ónersúıer qaýym Abaıdyń jumys ornynan altyn tústi orasan zor kitaphana, globýs, armıllıardy kóre alady. Al bólmeniń esigi tańdanǵan jurtshylyqtyń aldynda aıqara ashylady. Sońǵy kóriniste paıdalanylatyn 3D-tehnologııasy óte oryndy qosylyp, shattyqqa toly áserge bóleıdi.

«Astana Opera» MOBT qoıylymyndaǵy «Abaı» operasy 2018 jylǵy Ádebıet jáne óner salasyndaǵy memlekettik syılyq alýǵa usynylyp, ekinshi kezeńine ótkenin aıta ketken jón. Mýzyka synshylary atalmysh sahnalyq qoıylymnyń alyptyǵyn, kópqyrlylyǵy men aýqymdylyǵyn birneshe ret atap ótti. Ol Qazaqstannyń opera óneriniń jańa kezeńi bolyp tabylady jáne álemniń úzdik sahnalarynda talaı ret usynylatyny sózsiz.

«Karlo Felıche» teatrynyń basshylyǵy ıtalııalyqtardyń «Astana Operanyń» Nıý-Iork, Parıj jáne Eýropa men AQSh-tyń basqa da qalalarynda sátti ótken gastrolderi jaıly estip, qanyq bolǵandyǵyn jetkizdi.

«Bul Italııanyń opera tarıhyndaǵy ǵalamat «Abaı» spektakliniń tuńǵysh oryndalýy bolmaq. Oqıǵaǵa erekshe mańyzdylyq ústeıtin onyń qazaq tilinde qoıylýy», - dep atap ótti «Karlo Felıche» teatrynyń dırıjeri Djýzeppe Akýavıva.

Budan bólek, «Astana Opera» teatrynyń ujymy genýıalyq kórermenniń nazaryna L.Bethovenniń №9 Sımfonııasyn usynady. Shıllerdiń «Qýanysh» odasynyń mátinine jazylǵan sımfonııadaǵy hordyń fınaly týyndynyń ıdeıasyn aıtarlyqtaı asha túsedi.

Bethovenniń ómir súrip, talaı týyndylardy dúnıege ákelgen Vena qalasynda bilim alǵan jáne venalyq klassıkalyq dırıjerlik mektebiniń ókili Alan Bóribaev Sımfonııalyq orkestrge dırıjerlik etedi.

Sonymen qatar, kontsertke QR eńbek sińirgen qaıratkeri Erjan Dáýitovtyń jetekshiligimen «Astana Opera» men «Karlo Felıche» hor ártisteri, sondaı-aq jetekshi solıster Qazaqstannyń eńbek sińirgen qaıratkerleri tenor Nurlan Bekmuhambetov, soprano Jupar Ǵabdýllına, metstso-soprano Dına Hamzına qatysady.