Abaılyq jastar robot tehnıkasynan Qytaıda ótken chempıonatta bedeldi marapatqa ıe boldy
ASTANA. KAZINFORM - 18-19 mamyrda Shanhaıda FIRST Tech Challenge jahandyq robototehnıka lıgasy aıasynda The CaoLu Cup Teenage Robot Design and Build Invitational Tournament jabyq ulttyq chempıonaty ótti. Oǵan Qytaıdyń 300-ge jýyq myqty robotshylary men Qazaqstannan shaqyrylǵan «Tengrı» komandasy qatysty.
El namysyn Abaı oblysy Semeı qalasyndaǵy №5 Shákárim atyndaǵy kópsalaly gımnazııanyń 7-synyp oqýshylary: Osman Qýanyshbek, Temirlan Abylaıhan, Baljan Naımanǵazına, Nurken Tóleýbek, Nurtóre Maqsatov, Radmır Jeńisbek, Dosjan Sábıt jáne Alan Ermekbaev qorǵady.
Komanda jattyqtyrýshysy - Aıdos Tursynbekov.
Eki kúndik baıqaýdyń qorytyndysy boıynsha qazaqstandyq oqýshylar «Motivate Award» nomınatsııasynda jeńiske jetti.
«Bizdiń oqýshylar Qytaıdyń úzdik komandalarymen saıysqa tústi. Bul úlken tájirıbe almasý boldy. Balalar jas ereksheligine jáne tildik qıyndyqqa qaramastan, robot oıynynda óte jaqsy óner kórsetti. Shákirtterimniń tabandylyǵyn maqtan tutamyn», - deıdi jattyqtyrýshy.
Esterińizge sala keteıik, komanda Oqý-aǵartý mınıstrliginiń qoldaýymen USTEM Foundation qory men «Daryn» respýblıkalyq ǵylymı-praktıkalyq ortalyǵy uıymdastyrǵan Astanada ótken Ortalyq Azııa chempıonatynda joǵary nátıje kórsetip, chempıonatqa joldama alǵan bolatyn.
