«Abaı oqýlarynyń» jeńimpazy anyqtaldy
ASTANA. QazAqparat - Búgin Elbasynyń kitaphanasy «Abaı oqýlary» atty áleýmettik jelilerdegi jyl saıynǵy ádebıet baıqaýynyń nátıjelerin qorytyndylady, dep habarlaıdy kitaphananyń baspasóz qyzmeti.
Elimizdiń túrli aımaqtarynan qoldaý tapqan joba Memleket basshysynyń «Rýhanı jańǵyrý» baǵdarlamasy aıasynda uıymdastyryldy.
«Memleket basshysy N.Á. Nazarbaev: «Abaı sózi - qazaqtyń boıtumary. Abaı murasy - qazaqtyń eń qasıetti qazynasy», - deıdi. Qoǵamdyq sanany jańǵyrtý baǵdarlamasyn qoldaý jolynda Elbasy kitaphanasy Abaı murasyn jastar arasynda dáripteý jáne olardyń ádebı talǵamyn qalyptastyrý, oqý mádenıetin ilgeriletý máselesin myqtap qolǵa aldy. Osy oraıda «Abaı oqýlary» el azamattarynyń boıyndaǵy ulttyq rýhty kóterip, otansúıgishtik qasıetter men áleýmettik, azamattyq jaýapkershilikti arttyrýǵa baǵyttaldy», - dedi Qazaqstan Respýblıkasynyń Tuńǵysh Prezıdenti - Elbasy kitaphanasy dırektorynyń birinshi orynbasary Ámirhan Rahymjanov sharanyń ashylý saltanatynda.
«Abaı oqýlaryn» birinshi oryndy Almaty oblysy Qaskeleń qalasyndaǵy «Aıajan Qarasaı» medıtsınalyq kolledjiniń túlegi Saltanat Ótebaı qanjyǵasyna baılady. ІІ dárejeli dıplommen Astana qalasy Qazaq ulttyq óner ýnıversıtetiniń 2 kýrs stýdenti Raýan Ábdýalı marapattaldy. Úshtikti Soltústik Qazaqstan oblysy Aqbulaq aýylyndaǵy Chehov orta mektebiniń 11 synyp oqýshysy Vıktorııa Vıýshkına men Almaty oblysy Qarasaı aýdany Úshqońyr aýylyndaǵy orta mektep-gımnazııasynyń 8 synyp oqýshysy Baǵıla Nıetýllaeva túıindedi. Almaty oblysy, Jambyl aýdany Qaınazar orta mektebiniń oqýshylary, apaly-sińlili Darııabaı Ásel men Arýjan yntalandyrý syılyǵy men «eń jas qatysýshy» nomınatsııasyn ıelendi. Al Nottıngem ýnıversıtetiniń 2 kýrs stýdenti Janbota Dúısebaeva «Abaı murasyn álemdik keńistikte dáripteý» nomınatsııasynyń júldegeri atandy. Olarǵa tyń kitap toptamalary men biregeı estelik syılyqtary tartý etildi.
Shara barysynda kópshilik nazaryna usynylǵan kitap kórmesinde Kitaphana qory men Elbasynyń jeke kitaphanasyndaǵy biregeı basylymdar berildi. Qonaqtar Abaı týyndylary alǵashqy aýdarmalarynyń túpnusqalarymen tanysty.
