Abaı oblysynyń Jarma aýdanynda 3 adam ıis tıip ýlandy

ASTANA. QazAqparat – Bıyl 23 naýryzda saǵat 12:59-da «101» pýltine Jarma aýdanyndaǵy Jańǵyztóbe aýylynda 2 eresek adam men 1 balanyń ýly gazdan ýlanǵany týraly habarlama kelip tústi, dep habarlaıdy QazAqparat Abaı oblysy TJD baspasóz qyzmetine silteme jasap.

Aqparat jınaý barysynda jer úıde qatty otynmen jylytylatyn peshti (tazartylmaǵan tútin murjasy) paıdalaný erejeleri buzylǵandyqtan 1968 jyly týǵan er adam men 2016 jyly týǵan balanyń ıis tıip ýlanǵany jáne Jarma aýdanynyń ortalyq aýdandyq aýrýhanasynyń reanımatsııa bólimshesine jatqyzylǵany anyqtaldy.

Sondaı-aq, 1962 jyly týǵan áıel orta dárejede ýlanyp dárigerlerdiń tekserýinen keıin Jarma aýdanynyń ortalyq aýrýhanasynyń qabyldaý bólmesine jatqyzyldy.

Abaı oblysynyń TJD jeke turǵyn úı qurylystarynyń ıelerinen peshterdi paıdalaný kezinde kelesi qaýipsizdik erejelerin saqtaýdy suraıdy:

- janyp jatqan peshti qaraýsyz qaldyrmaý qajet;

- peshte jaryqtardyń bolýy, bitelgen murja qaıǵyly jaǵdaıǵa ushyratýy múmkin;

- peshterdi paıdalaný jónindegi nusqaýlyqtarda kózdelmegen janǵysh zattardy (qatty, suıyq, gaz tárizdi) otyn retinde qoldanýǵa bolmaıdy;

- kómir janyp bitkenshe pesh japqyshyn jappańyz;

- jaǵý úshin daıyndalǵan otyndy, sondaı-aq basqa da janǵysh zattar men materıaldardy jaǵý aldyndaǵy tósemege ornalastyrmańyz;

- janǵysh zattar men materıaldardy (aıaq kıim, kıim, otyn) pesh pen tútin joldarynyń betinen 0,5 m kem qashyqtyqta keptirmeńiz;

- kúl men qojǵa sý tógip, qaýipsiz jerge shyǵarý qajet;

«Esterińizde bolsyn, ýly gaz qaýipti, ol tez ári bilinbeı taraıdy, sondyqtan ómir men densaýlyq qabyldanǵan sharalardyń jyldamdyǵyna baılanysty. Ózińizdi jáne jaqyndaryńyzdy qorǵańyz!»,-delingen habarlamada.