Abaı oblysynyń oqýshysy qoı sharýashylyǵyn avtomattandyrý jobasyn oılap tapty

SEMEI. QazAqparat - Abaı oblysy Aıagóz aýdanyndaǵy qalalyq kópbeıindi qazaq mektep-gımnazııasynyń oqýshysy Beknur Aıdarbek qoı sharýashylyǵyn avtomattandyrýdy oılap taýyp, sharýa qojalyǵyna usyndy, dep habarlaıdy QazAqparat.

Maqsat - Shopan ata tólin kóbeıtý.

Jobanyń tıimdiligi:

- zamanýı jabdyqtardy paıdalaný;

- joǵary sapa;

- az shyǵyn;

- qojalyqtardy avtomattandyrý arqyly sharýashylyq jumysyn jeńildetý.

«Jobada qoıshynyń jumysyn jeńildetý úshin jem, shóp naýaǵa avtomattandyrylǵan júıe arqyly salynyp, sý motor arqyly quıylady.

Fermanyń ishi jaryq, taza. Qoılardy jaıý úshin «elektroqoıshy» qurylǵysyn usynamyz. Qurylǵy mobıldi, basqa jaıylymǵa aparyp ornatýǵa da bolady. 2 ga jer symmen qorshalyp, qoı sol qorǵannyń ishinde jaıylady»,- deıdi 8 synyp oqýshysy Beknur Aıdarbek.

Beknur jobany iske asyrý kezeńinde qarajattyń jumsalýyn eseptep, ekonomıkalyq tıimdiligin de kórsetken, marketıngtik josparyn jasaǵan.

«Jazǵy, qysqy demalys kezinde aýylǵa baryp, atama kómektesemin. Sharýashylyqta mal baǵý, jem-shóp daıyndaý sekildi jumys kóp. Meniń armanym — sharýashylyqty avtomattandyrýǵa qol jetkizý, bul ákem men atamnyń jumysyn jeńildeter edi», - deıdi Beknur.

Ol «Qoı sharýashylyǵyn avtomattandyrý» jobasyn mamyr aıynda ótetin festıvalǵa daıyndaýda.