Abaı oblysynyń medıtsınalyq avıatsııa qyzmeti 2 kún ishinde 4 naýqasqa kómek kórsetti

SEMEI. QazAqparat - Búgin Abaı oblysynyń medıtsınalyq avıatsııa qyzmetiniń mobıldi brıgadasy Aıagóz aýdanyndaǵy jambas jaraqaty bar naýqasty tasymaldaý úshin L-410 áýe kemesimen ushýdy júzege asyrdy, dep habarlaıdy QazAqparat.

Jergilikti ákimdiktiń málimetinshe, naýqas kúrdeli ota jasaý úshin qalalyq jedel járdem bólimine jetkizildi. Áýe kemesiniń bortynda naýqasqa qajetti tolyq medıtsınalyq kómek kórsetý múmkindigi qamtylǵan. 3 naýqasty zembilmen tasymaldaýmen qosa, 7 oryn da qarastyrylǵan.

«Buǵan deıin oblystyń jetekshi dárigerleri 3 júkti áıelge jedel medıtsınalyq kómek kórsetý úshin jańa L-410 ushaǵymen Úrjar aýylyna alǵashqy ushýdy júzege asyrdy.

Osy ýaqytqa deıin oblysta bir AN-2 ushaǵy bolǵan. Ulttyq shuǵyl medıtsınany úılestirý ortalyǵynyń qoldaýymen oǵan jańa L-410 laıneri qosyldy. Mamandardyń aıtýynsha, jańa áýe kemesiniń ushý uzaqtyǵy 2 ese jyldam», - dep jazdy vedomstvodan.

L-410 tobynyń ushaqtary -50°C-tan +50°C-qa deıingi temperatýra dıapazonynda ekstremaldy klımattyq jaǵdaılarda usha alady. Áýe kemesi asfalttalmaǵan qysqa ushý-qoný jolaqtaryna qonyp-ushyp jaqyn jáne ortasha qashyqtyqtarǵa ushýdy júzege asyra alady.

Medıtsınalyq avıatsııa qyzmeti byltyr 185 ushýdy oryndap, 222 naýqasqa kómek kórsetti, onyń 75-i balalar. Semeıdiń beldi dárigerleri aımaqtarǵa baryp, 14 kúrdeli ota jasady.