Abaı oblysynyń qutqarýshylary bıyl 138 adamdy aman alyp qaldy
SEMEI. QazAqparat – Abaı oblysynyń qutqarýshylary jyl basynan beri 138 adamdy aman alyp qaldy, dep habarlaıdy QazAqparat tilshisi.
Oblystyq TJD baspasóz qyzmetiniń málimetine súıensek, 16 qarasha kúni QR Tótenshe jaǵdaılar vıtse-mınıstri Marat Kúldikov Abaı oblysyna kelip, halyqpen kezdesti. Óńirdiń sý tasqynyna qaýipsizdigi, orman órtterinen qorǵalýy, azamattyq qorǵaý qyzmetkerleriniń áleýmettik qamsyzdandyrylý jaǵdaıyn jaqsartý týraly sóz qozǵaldy.
Jyl basynan beri TJD bólimsheleri 2 800-den astam ret túrli jaǵdaılarǵa attandy. Sonyń nátıjesinde 138 adam qutqarylyp, qaýip ornynan evakýatsııalandy.
«Oblystaǵy tabıǵı órtterge qatysty ahýal erekshe nazar aýdarýdy qajet etedi. Búgingi tańdaǵy negizgi mindetimiz - eldi mekender men mańyzy bar obektilerdi maýsymdyq qaýip-qaterlerden qorǵaý boıynsha tıimdi sharalardy iske asyrý. Alda qys mezgili kele jatyr. Tótenshe jaǵdaılardyń aldyn alý sharalaryna jáne halyqqa kómek kórsetý jaǵdaıynda jedel den qoıýǵa nazar aýdarǵan jón, - dedi Marat Kúldikov.
Kezdesýden keıin vıtse-mınıstr azamattardy jeke máseleleri boıynsha qabyldady.
