Abaı oblysynyń ákimi birinshi toptaǵy múgedek jandy keńesshisi etip taǵaıyndady
Abaı oblysynyń ákimi Nurlan Uranhaev múmkindigi shekteýli jandarmen kezdesip, olardy tolǵandyrǵan saýaldarǵa jaýap berdi. Múgedektigi bar azamattar qoǵamdyq kólikterde, jer asty ótkelderi men túrli ǵımarattarda pandýstardyń joqtyǵyn, ınvataksı, tonometr, qolarbalardyń jetkiliksizdigin jáne jumyspen qamtý deńgeıiniń tómendigi sekildi máselelerdi kóterdi.
«Osy oraıda aımaq basshysy birinshi top múgedektigi bar Rýslan Erembaevty ózine shtattan tys keńesshi etip taǵaıyndady. Bul bastama múmkindigi shekteýli jandardyń máselesin baqylaýda ustap, sala mamandarymen birlese otyryp, olardy sheshý joldaryn qarastyrýǵa múmkindik beredi», - dep habarlady ákimniń baspasóz qyzmetinen.
Búgingi tańda óńir boıynsha 28 myńnan astam múgedektigi bar adam turady. Onyń ishindegi 3 000-ǵa jýyǵy balalar.
«Múgedektigi bar adamdardy áleýmettik qoldaý, olardyń ómir sapasyn jaqsartý - memleket saıasatynyń basty baǵyttarynyń biri. Sondyqtan ınvataksı, pandýs, medıtsınalyq qurylǵylar, qolarbalar jáne ózge de qajetti zattarmen tolyqtaı qamtamasyz etemiz. Múmkindigi shekteýli jandarǵa kedergisiz orta qalyptastyrý maqsatyndaǵy jumystar jalǵasýda. Memlekettik qyzmet kórsetetin 575 nysan 2025-shi jylǵa deıin tolyqtaı beıimdeletin bolady», - dedi Nurlan Uranhaev.
2021-2025 jyldarǵa arnalǵan kásipkerlikti damytýdyń ulttyq jobasy aıasynda bıylǵy 9 aı ishinde oblystaǵy múmkindigi shekteýli 220 adam jumyspen qamtylǵan. Onyń 75-i turaqty jumysqa alynǵan bolsa, 10 adam jastar tájirbıesi boıynsha, 125-i qoǵamdyq jumysqa, 5-eýi áleýmettik jumys ornyna, taǵy beseýi «Kúmis jas» jobasy boıynsha eńbek etýde.
Budan bólek, 2021 jyly áleýmettik qyzmet portaly quryldy. Portal boıynsha múgedektigi bar adamdar tehnıkalyq kómek quraldaryn, sýrdo, tıflo qurylǵylar jáne sanatorıı, kýrorttyq emdeý ornyn jáne jeke kómekshi mamanyn ózderi tańdaı alady.
