Abaı oblysyndaǵy jylý jelileriniń 63 paıyzyna jóndeý qajet
«Oblystaǵy jylý jelileriniń ortasha tozý deńgeıi – 63,8 paıyz. Semeı qalasynda – 68 paıyz, Kýrchatov qalasynda – 35, Jarma aýdanynda – 75, Borodýlıha aýdanynda – 63, Úrjar aýdanynda – 30 jáne Abaı aýdanynda – 25 paıyz. Jaǵdaı óte aýyr, sebebi, jeliler 0,8 MPa gıdravlıkalyq synaqqa tótep bere almaıdy. Al, qalypty gıdravlıka – 1,6 MPa (16 kgs/sm2). Oblys ortalyǵynyń damýyn eskere otyryp, 2023-2024 jyldary saǵatyna 118 Gkal jylý energııasynyń tapshylyǵy eki esege ósetinin atap ótken jón», - deıdi oblys ákimi Nurlan Uranhaev.
Qazir Semeıdegi «Ǵabbasov» pen «Ortalyq» qazandyqtaryna sýmen jylytylatyn qosymsha qýaty 20 Gkal/saǵ qazandyq ornatylyp jatyr. Eki qazandyqtaǵy byltyr bastalǵan jumysty aıaqtaýǵa respýblıkalyq bıýdjetten 1,3 mlrd teńge bólinipti. Budan bólek, shahardaǵy 3 jylý berý pýnkti men 27 shaqyrym jylý jelisin jańartý da josparlanyp otyr. Buǵan respýblıkalyq bıýdjetten 3 mlrd teńge bólingen.
Sonymen qatar, shahardaǵy 13 jylý berý pýnkti men 10 shaqyrymǵa jýyq jylý jelisin aǵymdaǵy jóndeýden ótkizýge, jylýmen jabdyqtaý júıesin ashyq ádisten jabyq tásilge kóshirýge oblystyq jáne qalalyq bıýdjetten 2 mlard teńgeden astam qarjy qarastyrylǵan. Semeıdegi «Teplokommýnenergo» mekemesiniń dırektory Serik Tólenbergenovtiń aıtýynsha, bul qarajattyń ózi jetkiliksiz. Sebebi, Semeıdegi jylý jelileriniń 68 paıyzy eskirgen. Qaladaǵy 322 shaqyrym jylý júıesiniń 249 shaqyrymyn jańalaý qajet. Oblys ortalyǵyndaǵy 76 jylý berý pýnktiniń 42-siniń jaǵdaıy máz emes. Tipti, 90 paıyzǵa deıin tozyp turǵany da bar. Shahardy jylýmen jabdyqtaýshy uıym basshysynyń pikirinshe, birinshi kezekte qalanyń 35 paıyzyna jylý berip otyrǵan №1 Jylý elektr ortalyǵy, «Ortalyq», «103», «RK 1» jáne «RK 3» qazandyqtaryna tıesili jylý jelilerin tolyq aýystyrý qajet. Óıtkeni, shahardyń ınfraqurylymy jyldan-jylǵa emes, kúnnen-kúnge tozyp barady.
«Abaı oblysyn damytýdyń keshendi josparyna quny 150 mlrd teńgeden asatyn 30 joba engizilgen. Biraq, bes jyldy kútip otyrsaq, kóp ýaqyt joǵaltamyz. Qazir biz 19 joba ázirlep qoıdyq. Jobalyq-smetalyq qujattaryn jasaý úshin memorandýmǵa qol qoıyldy. Onyń 13-i qaladaǵy jylý jelilerin, 6-ýy jylý qazandyqtaryn jańǵyrtýǵa arnalǵan. Alǵashqysyna 19, keıingisine 14 mıllıard teńge qajet. Qoryta aıtqanda, 2023 jylǵa – 34, 2024 jylǵa – 80 mıllıard teńge qajet. Úkimetten qosymsha qarjy bólinse, 60 shaqyrymǵa jýyq jylý jelisin jańalaýǵa múmkindik týady», - deıdi ol.
Abaı oblysyn damytýdyń keshendi josparyna engizilgen 30 joba aıasynda jylý kózderin jóndeýge 95,5 mlrd teńge, jelilerdi jańǵyrtýǵa 54,9 mlrd teńge qarjy qajet.
Semeı halqyn san jyldan beri sarsańǵa salyp kele jatqan jylý máselesin sheshý úshin Prezıdent qalada jańa Jylý elektr ortalyǵyn salýdy tapsyrǵan bolatyn. Qazirgi ýaqytta mańyzdy nysannyń tehnıkalyq-ekonomıkalyq negizdemesi ázirlenip jatyr. Qujat jyl sońyna deıin daıyn bolýǵa tıis. Al jylý ortalyǵynyń qurylysyna Abaı oblysyn damytýdyń keshendi jospary aıasynda 480 mıllıard teńge bólinedi dep josparlanǵan.
Foto: semeynews.kz
