Abaı oblysyndaǵy órtti aýyzdyqtaý kezinde qandaı qatelik ketti – TJM ardageri
«Orman sharýashylyǵynyń órt sóndirý bólimderin Tótenshe jaǵdaılar mınıstrligine berý durys emes. Ol úshin birlesken jospar bolýy kerek. Meniń zeınetke shyqqanyma 20 jyldaı bolyp qaldy. Biz kezinde tek órtti sóndirýge jumyldyryldyq. Al, qazir jol apat, órt, sýdaǵy izdestirý jumystary, ónerkásiptik qaýipsizdik sııaqty dúnıelerdiń barlyǵy tótenshe jaǵdaılar mınıstrligine qaraıdy. Onyń bárin bir vedomstvoǵa júktep qoıýǵa bolmaıdy. Sondyqtan qandaı da bir quzyret bermes buryn, ol máseleni zertteý qajet. Áýelde pıottyq negizde sharalar qabyldaýǵa bolady. Keıin onyń nátıjesi jaqsy bolyp jatsa, onda tıisti fýnktsııany berý sheshimin qabyldaý oryndy dep esepteımin. Al, dál qazirgi ýaqytta oǵan erte. Búginde qajetti ókilettikterdi bere berse, onda jumys nátıjeli bolmaıdy», - dep pikir bildirdi Qanat Eshmuhanbetuly.
Sonymen qatar ol Abaı oblysyndaǵy órt kezinde jumystyń júıeli uıymdastyrylmaǵanyn atap ótti.
«Órt bastalǵan kezde aýmaqty tikushaqpen aralap shyǵý kerek. Jeldiń epkini men baǵytyn bilý qajet. Osy jumys durys bolmady dep oılaımyn. Órt qaı baǵytqa órship barady, adamdardy qaı jaqqa jiberý kerek? Osyny anyqtap almaı, sóndirýge qyzmetker jumyldyrý durys emes. Endi bolary bolǵannan keıin, bylaı isteý qajet degen jóndi bola qoımas. Degenmen adam shyǵyny bolmaıtyndaı etip jolyn qarastyrǵan abzal bolar edi. Negizi oqıǵa ornynda jedel shtab quryp, tikushaqpen aralap, shuǵyl sheshim qabyldaý qajet. Bizdiń halyq sondaı: bir jaıt bolmasa, qalaı bolsa solaı júre beredi. Byltyr iri órt Qostanaıda boldy. Bıyl Abaı oblysynda oryn alyp jatyr. Munyń barlyǵy jumysty durys uıymdastyrmaǵannan», - dep toqtaldy spıker tilshi saýalyna jaýap bere otyryp.
Buǵan qosa, Qanat Eshmaǵanbetuly orman sharýashylyǵyndaǵy órt qaýipsizdigin baqylaý jumystaryn kúsheıtý oryn dep pikir qosty. Onyń aıtýynsha, tilsiz jaýdyń bolaryn kútpeı, onyń aldyn alý jumystary júıeli negizde júrgizilip turýy tıis.
«Men kóbine Keńes kezinde qyzmet ettim. Sonda órt qaýipsizdigin baqylaıtyn, tekseretin arnaıy organ bolatyn. Olar ormannyń mańaıyn jyrtyp, órttiń aldyn alý sharalaryn qabyldaýǵa mindetteıtin. Qazir jeke kásipkerlerdi, bıznesti tekserýge tyıym salynǵan. Buryn ondaı shekteý bolmady, tıisinshe qadaǵalaý qatty edi. Sondyqtan órt qaýipsizdigin baqylaýdy kúsheıtý qajet. Mysaly, Eýropa elderinde ormandaǵy órt qaýipsizdigin baqylap otyratyn organ bar. Bizge de osyndaı bastamalardy qolǵa alý kerek. Jalǵyz TJM baryp, barlyǵyn óshire salady degen bolmaıdy. Mysaly, AQSh, Avstralııada orman órti bolyp jatady. Degenmen olarda naqty alogorıtm bar», - dep sózin túıindedi tótenshe jaǵdaılar salasynyń ardegeri.
Qanat Eshmuhanbetulynyń sózinshe, órt sóndirýge qajetti tikushaqtardy ormanǵa jaqyn mańaıǵa ornalastyrý da mańyzdy. Sonymen qatar, qandaı da bir aımaqta tótenshe jaǵdaı bola qalǵan kezeńge arnap, sý alatyn aıdyndardy belgilep qoıý qajet.
