Abaı oblysyndaǵy órt: birneshe eldi mekenge qaýip tóndi

ASTANA. QazAqparat – Osy ýaqytta Abaı oblysyndaǵy 3 ýchaskede órtti sóndirý jumystary júrgizilip jatyr. Órttiń taralýy toqtatyldy, órt sóndirý jekelegen oshaqtarda júrgiziledi, dep habarlaıdy QazAqparat QR Tótenshe jaǵdaılar mınıstrliginiń baspasóz qyzmetine silteme jasap.

Baspasóz qyzmetiniń málimetterine qaraǵanda, jeldiń kúsheıýine baılanysty Tuzdy kól aýdanyndaǵy úshinshi ýchaskede órt tómennen joǵaryǵa aýysty. Órtti sóndirý úshin 20 tehnıka, jeke quramnan 64 adam jumyldyryldy.

Órttiń taralýynyń aldyn alý maqsatynda mańaıdaǵy jerler jyrtyldy. Aldyn ala boljam boıynsha órttiń aýdany 1500 ga quraıdy.

Berezovka sanatorııi (108 adam, 36 úı), Berezovka podhozy (169 adam, 53 úı) eldi mekenderine qaýip tóndi. Órt ornyna deıingi qashyqtyq shamamen 5-7 km. Ol jerge 4 tehnıka baǵyttaldy.

Orman órtin sóndirýge barlyǵy 100 tehnıka (onyń ishinde 1 órt poezy) jáne 2 tikushaq, sondaı - aq 402 adam («Semeı Ormany» MOTR-66 birlik tehnıkasy, 231 adam, TJM 28 tehnıkasy, 1 tikushaǵy, 144 adam, QTJ 1 órt poıyzy, 10 adam, JAO 5 birlik tehnıkasy, 7 adam, Qazavıaormanqorǵaýdyń 1 tikushaǵy, 6 adam ekıpajy, 1 ÝAZ, 4 adam) jumyldyryldy.

Sondaı-aq, orman órtin «Qazavıaqutqarý» AQ MI-873 jáne sý aǵyzý qurylǵysy bar MI-8 tikushaqtary sóndirip jatyr. Qazirgi ýaqytta 59 ret sý aǵyzyldy (157,5 tonna.).

TJM-de jáne Departamenttiń daǵdarys ortalyǵynda, sondaı-aq jergilikti jerde jedel shtabtar uıymdastyryldy. Jedel jeli telefondary jumys istep tur.

«Qazgıdromet» derekteri boıynsha 24-26 mamyrda Abaı oblysynyń Borodýlıha aýdanynda ekpini 15-20 m/s deıin bolatyn soltústik-shyǵysqa baǵyttalǵan jel kútiledi.

Osyǵan deıin Abaı oblysyndaǵy órttiń 1,1 gektarǵa taraǵanyn jazdyq.

Sondaı-aq «Qazavıaqutqarý» mekemesiniń tikushaǵy jumyldyrylǵanyn habarladyq.