Abaı oblysyndaǵy Eńlik-Kebek kesenesi jańǵyrtyldy
SEMEI. QazAqparat – Abaı oblysynda Muhtar Áýezovtyń 125 jyldyǵyna oraı Eńlik-Kebek kesenesi ashyldy, dep habarlaıdy QazAqparat tilshisi.
Abaı oblysy ákimdigi baspasóz qyzmetiniń málimetine súıensek, zańǵar jazýshy Muhtar Áýezovtiń mereıtoıy týǵan jeri Abaı aýdanynda keń kólemde atalyp ótilýde.
«Úsh kúnge josparlanǵan merekelik sharalar Semeı-Bórili-Qaraýyl baǵytynda kezeń-kezeńimen ótýde. Mereıtoı Muhtar Áýezovtiń áke-sheshesi Omarhan men Nurjamaldyń kesenesine baryp quran baǵyshtaýdan bastaldy. Artynsha kemeńger jazýshynyń týǵan jeri Bórilide bes jasar túıeni qurbandyqqa shalyp, Áýezov rýhyna taǵzym jasaldy», - delingen aqparatta.
Jazýshynyń 125 jyldyǵyn atap ótý jónindegi respýblıkalyq josparǵa sáıkes bıyl 4 baǵyt boıynsha 82 is-shara uıymdastyrylǵan.
«Abaı aýdanynda isker azamattar men jergilikti halyqtyń qoldaýymen Keńgirbaı bıge eskertkish ornatyldy. Sondaı-aq jańartylǵan Eńlik-Kebek kesenesiniń saltanatty ashylýy boldy. Áýezovtiń mereıtoıy týǵan jerinde úsh kún boıy toılanbaq. Shara barysynda, qazaqsha kúres, alaman báıge, jorǵa jarys, fýtbol, gala kontsert ótkizý kózdelýde», - delingen habarlamada.
