Abaı oblysyndaǵy Besqaraǵaı aýdanynda tótenshe jaǵdaı rejımi alynyp tastaldy

SEMEI. QazAqparat – Abaı oblysyndaǵy Besqaraǵaı aýdanynda órtke baılanysty jarııalanǵan tótenshe jaǵdaı rejımi alynyp tastaldy, dep habarlaıdy QazAqparat tilshisi.

Begenev ormanshylyǵynda 14 shildede qurǵaq shóp janyp, orman qoryna qaýip tóngen bolatyn. Soǵan oraı, Besqaraǵaı aýdanynyń ákimi Talǵat Muratovtyń sheshimimen tótenshe jaǵdaı jarııalanǵan.

Ormanshylar men qutqarýshylardyń birlesken is-qımylynyń arqasynda 26 shilde kúni saǵat 18:00-de 385 gektar alqapqa jaıylǵan orman órti tolyǵymen sóndirildi.

«Semeı Ormany» memlekettik orman tabıǵı rezervatynan usynǵan málimetke súıensek, endi Besqaraǵaı aýdanyndaǵy tótenshe jaǵdaı rejımi kúshin joıdy.

«Osyǵan baılanysty azamattarǵa erekshe qorǵalatyn «Semeı Ormany» rezervatynyń Besqaraǵaı aýdanyndaǵy tabıǵı aımaǵyna jáne Shoshqaly tuzdy-balshyq kólindegi demalys oryndaryna barýǵa ruqsat etildi», - delingen aqparatta.