Abaı oblysyndaǵy aýyldarda 50 mektep jóndeýden ótedi
«Jaıly mektep» ulttyq jobasy aıasynda Abaı oblysynda 5700 orynǵa arnalǵan 11 mektep salynady.
Ol úshin respýblıkalyq bıýdjetten 42 mlrd teńge qarastyrylǵan.
Bul týraly baspasóz máslıhaty barysynda oblystyq bilim basqarmasynyń basshysy Nurjan Ahmetqalıev málim etti.
«2023 jyly qańtar aıynda Úkimette Abaı oblysyn damytýdyń keshendi jospary maquldandy. Keshendi jospardaǵy 14 shara bilim salasyn damytýǵa arnalyp otyr. Atalǵan sharalardy júzege asyrýǵa 53,5 mldr teńge bólinedi,- dedi Nurjan Ahmetqalıev.
Sonymen qatar mektepterge qosalqy 6 ǵımarat boı kóteredi.
Onyń ekeýi Semeıde, tórteýi Aıagóz qalasynda.
Eldi mekenderde ornalasqan 50 mektepke aǵymdaǵy jáne kúrdeli jóndeý jumysyn júrgizý, jańa modıfıkatsııalyq kabınetter ashý kózdelgen.
«Keshendi josparǵa sáıkes, Semeıdegi sol jaǵalaýda quny 8,5 mlrd teńge bolatyn Oqýshylar saraıy salynbaq. Abaı eliniń tarıhymen tanysýǵa elimizdiń túkpir-túkpirinen keletin oqýshylardy ornalastyrý maqsatynda Abaı aýdanyndaǵy arnaıy mamandandyrylǵan mektep-gımnazııasyna ınternat salynady. Abaı, Kókpekti, Aqsýat aýdandarynda jazǵy saýyqtyrý lagerin ashý josparlanǵan, - dedi N.Ahmetqalıev.
Basqarma basshysynyń aıtýynsha, búgingi kúni Abaı oblysynda oqýshylar 105 avtobýspen tasymaldanyp júr.
Onyń 27-si jańartylmaq. Al bıyl 11 avtobýs satyp alýǵa qarajat bólingen.
