Abaı oblysyndaǵy 3 aýyldan 64 bala evakýatsııalanyp, olarǵa barlyq kómek kórsetildi - mınıstrlik

ASTANA. QazAqparat - QR Oqý-aǵartý mınıstrligi Balalardyń quqyqtaryn qorǵaý komıtetiniń aqparaty boıynsha, Abaı oblysyndaǵy Bulaq, Talıtsa jáne Ýspenka aýyldarynan 150-den astam adam, onyń ishinde 64 bala evakýatsııalandy.

Qazirgi ýaqytta olar Semeı qalasyndaǵy eki kolledjge ornalastyryldy, dep habarlaıdy QazAqparat mınıstrliktiń málimetterine silteme jasap.

Olarǵa jan-jaqty kómek kórsetilýde, balalar barlyq kerek-jaraqpen, ystyq tamaqpen qamtamasyz etildi, kásibı psıhologtardyń kómegi uıymdastyryldy. Otbasylar úshin qalanyń kórikti jerleri men kınoteatrlarda túrli oıyn-saýyq is-sharalary ótkizildi. Osy kúnge deıin óńirde mınıstrliktiń aýmaqtyq departamenti, Balalardyń quqyqtaryn qorǵaý komıteti jáne Abaı oblysynyń bilim basqarmasy ókilderi tikeleı jumys isteýde.

Aýyl-aımaqtan evakýatsııalanǵan 9, 11-synyp túlekteri úshin qorytyndy attestattaýdy tapsyrý boıynsha barlyq qajetti jaǵdaı jasaldy. Qorytyndy emtıhandardy Semeı qalasynyń mektepterinde ótkizý josparlanyp otyr.

«QR Oqý-aǵartý mınıstriniń tapsyrmasy boıynsha óńirge Balalardyń quqyqtaryn qorǵaý komıtetiniń tóraǵasy Nasymjan Ospanova attandy. Qaza tapqan orman sharýashylyǵy qyzmetkerleriniń balalaryna barý josparlanyp otyr. Balalarǵa mınıstrlik tarapynan elimizdiń eń úzdik saýyqtyrý ortalyqtarynda jazǵy demalys usynyldy. Ata-analardyń kelisimimen balalarǵa psıhologtardyń kásibı kómegi kórsetiledi. Jańa oqý jylynan bastap balalar tegin ystyq tamaq, mektep formasy jáne basqa da oqý quraldarymen qamtamasyz etiledi. Balalardyń qaýipsizdigin qamtamasyz etý jáne quqyqtaryn qorǵaý – Oqý-aǵartý mınıstrliginiń baqylaýynda»,-delingen habarlamada.