Abaı oblysynda jas jigit 12 jyl boıy quldyqta bolǵan
Abaı oblysynyń polıtseıleri jedel-profılaktıkalyq shara barysynda adam eńbegin qanaý faktisin anyqtady.
Ózine bekitilgen aýmaqty tekserý barysynda turǵyndarmen únemi baılanysta júretin Jarma aýdany Shar qalasy PB polıtsııa qyzmetkerine aýmaǵyndaǵy sharýa qojalyǵynyń basshysy qońyraý shalyp, jańa jumysshy jaldaǵanyn habarlaǵan.
Sharýa qojalyǵyna kelgen polıtsııa qyzmetkeri jumysqa jańadan kirisken jaldamalynyń qujattarynyń joqtyǵyn anyqtaǵan, sondaı-aq polıtseıge óziniń saýalnamalyq derekterin de aıta almaǵan.
Bir shıkiliktiń baryn sezgen tártip saqshysy sharýashylyq ıesi jábirlenýshiniń qasynan ketken kezde onyń tegin bilip alǵan.
Odan ári polıtsııa qyzmetkeri jábirlenýshiniń ápkesin tapty. Belgili bolǵandaı, ol baýyrymen 2010 jyldan beri baılanys úzgen.
Er adam Jarma aýdanyndaǵy sharýa qojalyqtarynyń birinen tabyldy. Ol onda jumys istegen.
Tergeý barysynda 2010 jyldyń qarasha aıynan bastap 26 jastaǵy er adamnyń 11 sharýa qojalyǵynda quldyqta bolǵany anyqtaldy.
Buǵan deıin birneshe ret sottalǵan 54 jastaǵy Semeı turǵyny 26 jastaǵy Tarbaǵataı aýdanynyń turǵynymen Tuǵyl aýylyna balyq aýlaýǵa barǵanda tanysqan.
Fızıkalyq turǵydan jetilgen jas jigittiń psıhıkalyq aýytqýyn baıqaǵan ol jigitti sharýashylyqta jumys kúshi retinde paıdalanýdy oılaǵan.
Jábirlenýshini 12 jyldan astam ýaqyt boıy Semeı qalasy, Abaı, Ulan jáne Jarma aýdandaryndaǵy sharýa qojalyqtarynda jumys isteý úshin satqan.
54 jastaǵy azamat sharýa qojalyq ıelerine ózin jigittiń týysymyn dep tanystyrǵan.
Olardan aldyn ala jalaqysyn alyp, qaltasyna basyp otyrǵan. Jábirlenýshiniń jyldar boıy eńbegine berilgen aqy 2 mln teńgeni quraǵan.
Sonymen qatar qaskóı múgedektiń aı saıynǵy zeınetaqy jınaǵy men áleýmettik tólemderin jymqyryp otyrǵan. Zalaldyń jalpy somasy 4 mln teńgeden asady.
– Qazirgi ýaqytta jábirlenýshi týystaryna tabystaldy, al kúdikti Jarma aýdanynyń aýdandyq sotymen Qylmystyq kodekstiń 128-babynyń 2-bóligi 2, 8, 11, 12-bólekteri jáne 190-baby 1-tarmaǵynyń 3-bóligi boıynsha kináli dep tanyldy. Sot úkimimen qaýipsizdigi ortashada kolonııada 4 jyl 6 aıǵa bas bostandyǵynan aıyrý jazasy taǵaıyndaldy, – dedi Abaı oblysy PD bastyǵynyń orynbasary Narıman Kúldikov.
Foto: api.theins.info
