Abaı oblysynda taýǵa serýenge shyǵyp, joǵalyp ketken otbasy aman-esen tabyldy

SEMEI. QazAqparat – Abaı oblysynda taýǵa serýenge ketip joǵalyp ketken otbasy aman-esen tabyldy, dep habarlaıdy QazAqparat tilshisi.

Oblystyq Tótenshe jaǵdaılar departamenti baspasóz qyzmetiniń málimetine súıensek, oqıǵa búgin Úrjar aýdanynda bolǵan.

Belgili bolǵandaı, bir otbasy músheleri Besterek aýyldyq okrýgindegi taýǵa serýenge shyqqan. Barlyǵy 3 adam qalyń qar men borannyń saldarynan qaıta almaı qalǵan. Olar múlde habarsyz ketkendikten tanystary qutqarýshylarǵa habar berdi.

Habar túse salysymen aýdandyq tótenshe jaǵdaılar bóliminiń qyzmetkerleri men «Tarbaǵataı» ulttyq parkiniń mamandarynan qurylǵan arnaıy qutqarýshylar toby izdeýge attandy. Toptyń jedel ári birlese áreket etýiniń nátıjesinde joǵalǵan adamdar aman-esen tabyldy.

Olarǵa medıtsınalyq kómek qajet bolǵan joq.

Osy rette, qutqarýshylar aýa-raıynyń qolaısyzdyǵyna oraı óńir jurtshylyǵyna alys saparǵa shyqpaýǵa, taýly jerlerge barmaýǵa shaqyrady.