Abaı oblysynda soǵys ardagerleri 1,5 mln teńgeden alady

SEMEI. QazAqparat – Abaı oblysynda turatyn ekinshi dúnıejúzilik soǵystyń ardagerlerine 1,5 mıllıon teńgeden beriledi, dep habarlaıdy QazAqparat tilshisi Abaı oblysy ákimdiginiń baspasóz qyzmetine silteme jasap.

Jeńistiń 78 jyldyǵyna oraı Abaı oblysynyń 2 692 turǵyny birjolǵy tólem alady.

Olardyń qatarynda ekinshi dúnıejúzilik soǵystyń ardagerleri, kontslagerlerdiń burynǵy tutqyndary, tyl eńbekkerleri bar.

«Máselen, oblysta turatyn 12 soǵys ardagerine Jeńis kúnine 1,5 mıllıon teńgeden tólenedi. Óńirimizde Lenıngradty qorshaý kezinde qala kásipornynda jumys istegen jáne «Qorshaýdaǵy Lenıngrad turǵyny» belgisimen marapattalǵan bir adam qaldy. Oǵan 150 myń teńge beriledi. Ekinshi dúnıejúzilik soǵys kezinde fashıster men olardyń odaqtastary qurǵan kontslagerlerdiń, gettolardyń jáne basqa da májbúrli ustaý oryndarynyń burynǵy kámeletke tolmaǵan tutqyndary da 150 myń teńgeden birjolǵy tólem retinde alady. Oblysta osyndaı úsh adam bar» delingen ákimdik taratqan habarlamada.

Soǵys jyldarynda tyldaǵy qajyrly eńbegi men minsiz áskerı qyzmeti úshin KSRO ordenderimen jáne medaldarymen nagradtalǵan oblys turǵyndary da osyndaı somaǵa ıe bolady. Aımaqta bul sanattaǵy 42 adam bar.

1941 jylǵy 22 maýsymnan bastap 1945 jylǵy 9 mamyrǵa deıin keminde alty aı jumys istegen (qyzmet etken) jáne UOS jyldarynda tyldaǵy qajyrly eńbegi men minsiz áskerı qyzmeti úshin KSRO ordenderimen jáne medaldarymen nagradtalmaǵan 2 515 adamǵa mereke qurmetine 70 myń teńgeden tólenedi.