Abaı oblysynda sıntetıkalyq esirtki jetkizýmen aınalysqan top ustaldy

NUR-SULTAN. QazAqparat – Abaı oblysynda iri kólemde sıntetıkalyq esirtki jetkizýmen aınalysqan top ustaldy. Bul týraly ІІM baspasóz qyzmetiniń ókili Aqtoty Boranova málim etti, dep habarlaıdy QazAqparat tilshisi.

«Jedel operatsııa barysynda Shyǵys Qazaqstan oblysynyń polıtsııa qyzmetkerleri sıntetıkalyq esirtkiniń asa iri partııalaryn jetkizýmen aınalysatyn topty ustady. Abaı oblysyna qarasty Qalbataý aýyly mańyndaǵy tas jolda 35 jastaǵy Almaty turǵyny qolǵa tústi. Ol oblys ortalyǵyna «Sýbarý Legası» avtokóligimen bara jatqan. Jedel ýákilder onyń salonynan japsyrmamen oralǵan paket tárkiledi. Pakettiń ishinen «jyldamdyq» dep atalatyn kelige jýyq psıhotroptyq zat tabylǵan», - dedi Aqtoty Boranova vedomstvonyń baspasóz qyzmeti alańynda ótken brıfıngte.

Onyń atap ótýinshe, kúdiktiler esirtki zattaryn elektrondy aqparat júıesi arqyly óńirlerge taratýdy josparlaǵan. Tekserý barysynda olardyń esirtki zattarynyń bir bóligin Tekkeli qalasyndaǵy sybaılastaryna qaldyrǵany belgili boldy.

«ІІM Esirtki qylmysyna qarsy is-qımyl departamentiniń úılestirýimen Almaty oblysynyń polıtsııa qyzmetkerleri esirtkiniń bir bóligin Tekeli qalasynan 40 shaqyrym jerden tapty. Jasyrylǵan esirtkini alý barysynda jergilikti turǵyn ustaldy. Onyń avtokóligin teksergen kezde salmaǵy 2 kılogramm «mefedron» psıhotroptyq zattyń 4 túıirinen turatyn qaltasha tárkilendi. Sondaı-aq, ustalǵan azamattyń turǵylyqty jerinen «mefedron» salynǵan 154 zıp-paketi, býyp-túıý materıaldary men tarazy tárkilendi», - dedi ol.