Abaı oblysynda sheneýnik bir kreslony 38 mln teńgeden satyp almaq bolǵan
QR Sybaılas jemqorlyqqa qarsy is-qımyl agenttigi Abaı oblysy boıynsha departamentiniń málimetine súıensek, memlekettik satyp alý monıtorıngi aıasynda satyp alý qunyn asyra baǵalaý faktileri anyqtaldy.
«Máselen, Semeıdegi Mádenıet saraıynyń basshylyǵy ǵımarattar men qurylystardy qaıta jańǵyrtýdy jobalaý qyzmetin satyp alýdy josparlaǵan. Osy maqsattarǵa mekemede 1 mlrd teńge bólý qajettiligi týraly sheshim qabyldandy. Alaıda mundaı qyzmettiń naqty quny 10 mıllıon teńgeden aspaıdy», - delingen aqparatta.
Antıkordyń usynǵan usynysynan keıin ǵana bul soma joıyldy.
«Budan bólek, osy mekeme basshylyǵy bir danasy 38 mıllıon teńge turatyn kreslo satyp almaq bolǵan. Bul rette onyń naryqtaǵy quny - nebári 150 myń teńge, ıaǵnı 200 ese arzan. Bul satyp alý boıynsha da tıisti usynys hat joldandy, qazirgi ýaqytta ol qarastyrý ústinde», - delingen habarlamada.
