Abaı oblysynda Otbasynyń tsıfrlyq kartasy jobasy sátti júzege asýda
Jergilikti ákimdiktiń málimetinshe, onda «Otbasynyń portreti» dep atalatyn 9 járdemaqy men áleýmettik tólem boıynsha otbasy men onyń músheleri týraly derekter jınaqtalǵan. Memlekettik qoldaý sharalaryn alýǵa quqyq belgilengen kezde, memlekettik qyzmet alýǵa kelisim berý úshin járdemaqy alýshyǵa SMS habarlama jiberiledi.
«Búgingi kúnde pılottyq rejımde 1179 SMS habarlama jiberilip, 732 áleýmettik, zeınetkerlik jáne ataýly járdemaqy tólemderi taǵaıyndaldy. 2025 jylǵa qaraı áleýmettik, densaýlyq saqtaý jáne bilim salalarynyń memlekettik kepildendirilgen barlyq túrleri Tsıfrlyq kartamen qamtylatyn bolady.
Oblystardyń bólinýine baılanysty Abaı oblysyna 841 tósek-oryndyq 5 oblystyq medıtsınalyq – áleýmettik mekeme berildi, onyń ekeýi 161 oryndyq balalar mekemesi.
Budan basqa, qalalar men aýdandarda 13 aýmaqtyq áleýmettik qyzmet kórsetý ortalyǵy jumys isteıdi, onyń ishinde 5 myń adamdy qamtıtyn 34 bólimshe bar», - dep jazdy vedomstvodan.
Memlekettik-jekeshelik áriptestik sheńberinde Semeı qalasynyń «KARAGAILY» shıpajaıy AÁMM bazasynda jyl saıyn 1955 UOS qatysýshylary men olarǵa teńestirilgen tulǵalar shıpajaılyq-kýrorttyq em alatyn bolady. Shıpajaıǵa 2022 jyldyń 18 shildesinen bastap em alýshylardy qabyldaý uıymdastyryldy, búgingi kúni 652 adam em aldy.
Kelesi jyldan bastap múgedektigi bar adamdardyń turýyna tikeleı jaqyn jerde arnaýly áleýmettik qyzmetter kórsetý úshin syıymdylyǵy az úılerdi ashý jónindegi pılottyq jobany iske asyrý bastalady.
«Qazirgi jaǵdaı boıynsha ońaltýdyń jeke baǵdarlamasyna (OJB) sáıkes muqtaj azamattardyń jalpy sanynan 93,3%-y qamtamasyz etildi, 2021 jylmen salystyrǵanda 10% artyq.
2023 jyldan bastap múgedek balalarǵa arnalǵan qymbat turatyn tehnıkalyq ońaltý quraldaryn (OTQ) berý jónindegi ortalyq «OTQ parkin» qurý jónindegi pılottyq jobany iske asyrýdy bastaý kerek. OTQ satyp alý «Qazaqstan halqyna» qorynyń kómegimen júzege asyrylady.
2021 jyldan 2025 jylǵa deıin jyl saıyn 20%-dan 575 obektini qaıta jabdyqtaý josparlanǵan. Búgingi tańda 255 obekt nemese 44,3%-y beıimdelgen. 2023 jylǵa 102 nysandy beıimdeý josparlanǵan», - dep jazdy ákimdikten.
Sondaı-aq, oblysta 1540 múgedektigi bar, júrip-turýy qıyn adamdardy tasymaldaý qyzmetin qamtamasyz etetin «Invataksı» qyzmetiniń 16 avtokóligi jumys isteıdi. Kelesi jyly «Samruk-Kazýna Trust» korporatıvtik qorynyń qarajaty esebinen GAZ A31R33 markaly 3 avtomobıl jetkiziletin bolady.
Budan basqa, Semeı qalasynda 150 oryndyq múgedektigi bar adamdar úshin ońaltý ortalyǵynyń qurylysy júrgizilýde.
