Abaı oblysynda órtten zardap shekkenderge qarajat jınaý aıaqtaldy

SEMEI. QazAqparat – «Aq Ertis» qoǵamdyq qory Abaı oblysynda orman órtinen qaza tapqandar men zardap shekkenderdiń otbasylaryna qarajat jınaý aıaqtalǵanyn málim etti. Bul týraly óńir ákimdiginiń Telegram-kanalynda jarııalandy, dep habarlaıdy QazAqparat.

«Qurmetti qazaqstandyqtar! «Aq Ertis» qoǵamdyq qory Abaı oblysynyń Borodýlıha aýdanyndaǵy orman órti saldarynan qaza tapqandar men zardap shekkenderdiń otbasylaryna qarajat jınaý jáne gýmanıtarlyq kómek kórsetý úshin qol ushyn sozǵan elimizdiń barlyq turǵynyna úlken alǵysyn bildiredi.

Barlyq qazaqstandyqtardyń birigýiniń arqasynda birneshe kún ishinde qaza tapqandar men zardap shekkenderdiń barlyq otbasylaryna jan-jaqty kómek kórsetý úshin jetkilikti qarajat jınaldy.

Sondyqtan, alaıaqtardyń qandaı da bir alypsatarlyq áreketterin boldyrmaý úshin «Aq Ertis» qoǵamdyq qorynyń joǵaryda atalǵan maqsattarǵa qarajat jınaýy aıaqtalǵany týraly habarlaımyz.

Jınalǵan qarajatty bólý kezinde obektıvtilik pen ashyqtyqty qamtamasyz etý úshin tıisti ýákiletti komıssııalarmen ózara is-qımyl jasaı otyryp, qor kómek kórsetýde biryńǵaı tásildi ázirleıtin bolady», - delingen málimette.

Birneshe kún buryn Abaı oblysy ákimdiginiń resmı saıtynda «Aq Ertis» qoǵamdyq qory qaıyrymdylyqqa qarajat jınaýdy bastaǵanyn jarııalaǵan bolatyn.

Buǵan deıin Semeı ormanyndaǵy órtten qaza bolǵan 14 ormanshynyń otbasylaryna qandaı qoldaý sharalary kórsetiletinin jazǵan edik.

Tabıǵı rezervatta jalyn 8 maýsym kúni tutandy. Ottyń taralýy toqtatyldy, alaıda tolyǵymen óshirý jumystary jalǵasyp otyr.