Abaı oblysynda orman órtin sóndirý jumystary úsh baǵytta júrgizilip jatyr
Onda orman órtin sóndirý boıynsha negizgi mindetter tujyrymdaldy, sondaı-aq óńirdegi orman órt jaǵdaıyn turaqtandyrý úshin qosymsha sharalar ázirlendi.
«Órtti sóndirý jáne zalaldy azaıtý, eń bastysy – halyqty qorǵaý boıynsha barlyq qajetti sharalar qabyldandy. Oqıǵa ornynda táýlik boıy kezekshi mamandar, jedel shtab jumys isteıdi», - dep atap ótti mınıstr.
Ol sondaı-aq barlyq qajetti kúshter men quraldar qoıylǵan mindetterdi odan ári oryndaýǵa daıyn ekenin atap ótti.
Orman órtin sóndirýge Abaı, Jetisý, Shyǵys Qazaqstan, Qaraǵandy, Almaty oblystarynyń, sondaı-aq Astana jáne Almaty qalalarynyń TJD kúshteri men quraldary jáne TJM bólimderiniń áskerı qyzmetshileri qatysýda.
Otyrystan keıin mınıstr ormandy dala aımaǵynyń aýmaǵyna aerovızýaldy zertteý júrgizdi. Ushý qorytyndysy boıynsha órt oshaqtaryna kúshter men quraldardy qaıta toptastyrý júrgizildi. Sondaı-aq, órt ýchaskelerinde sý tógetin qurylǵylary bar tikushaqtardy aýystyrý týraly sheshim qabyldandy.
Orman órtin sóndirýge TJM, orman sharýashylyǵy komıteti, jergilikti atqarýshy organdar jáne Qorǵanys mınıstrligi 1500-ge jýyq adam jáne 300-den astam tehnıka jumyldyryldy. Órt bastalǵannan beri 14 tikushaqtyń kómegimen jalpy kólemi 3039 tonnadan asatyn 1017 sý shashý júzege asyryldy.
Órtti sóndirý kúrdeli relefti jerler men 17 m/s qatty ekpindi jeldiń saldarynan qıynǵa soǵýda. Jaǵdaıdy eskere otyryp, Syrym Sháriphanov jedel shtabqa tıisti tapsyrmalar berip: «Órtti toqtatý jáne oqshaýlaý asa kúrdeli jáne kóp eńbekti qajet etedi. Jer bederiniń jaǵdaılary men otpen kúrestegi kedergiler eskerilýi kerek», dep atap ótti.
Qazirgi ýaqytta Abaı oblysynda órtti sóndirý úsh baǵytta jalǵasýda (ońtústik, batys jáne shyǵys jıekter). Shyǵys baǵytta aýyr tehnıkamen mıneraldanǵan jolaqtar jasaý jumystary júrgizilýde.
S. Sháriphanov orman órtin sóndirýge qatysqandardyń barlyǵyna alǵysyn bildirip, qalyptasqan jaǵdaılarǵa qaramastan, birlesken kúsh-jiger tabıǵı apatty tez arada joıýǵa ákeletinine sendirdi.
