Abaı oblysynda Qazaqstannyń birneshe aımaǵynan kelgen áskerıler oqý-jattyǵý ótkizdi
Jıynǵa Abaı oblysynan bólek, Pavlodar, Óskemen, Kýrchatov qalalarynda ornalasqan áskerı bólim komandırleri men orynbasarlary qatysty. Semeı irgesindegi 3 kúnge sozylǵan polıgon aýmaǵyndaǵy oqý-jattyǵý jıynynyń maqsaty – áskerılerdiń kásibı biliktiligin arttyryp, sheberlikterin shyńdaý. Birneshe aımaqtan kelgen áskerıler ózara tájirıbe almasty.
«Kúsheıtilgen qarý-jaraqpen jabdyqtalǵan BTR-80 sońǵy jańartylǵan túri jol talǵamaıdy, oıly qyrly jerlermen júre beredi. Ony Keńes áskerleri Aýǵan soǵysynda qoldanǵan. Keıin 90-shy jyldardan bastap Reseı Qarýly Kúshteriniń jáne basqa da birqatar burynǵy keńestik respýblıkalardyń barlyq iri qarýly qaqtyǵystarynda qoldanylǵan. Ony basqarý da ekiniń biriniń qolynan kele bermeıdi. BTR 80 tek shuńqyrlardy ǵana emes, sonymen qatar sý kedergilerin de qaýipsiz jeńe alady», - deıdi 5518 áskerı bóliminiń aǵa mehanık júrgizýshisi serjant Rýslan Bekenov.
Oqý jattyǵý jıynynda áskerı qyzmetkerlerge barlyq jaǵdaı jasalǵan. Jattyǵýdan keıin tynystaý úshin arnaıy demalatyn oryndarmen jabdyqtalǵan tehnıkalar da bar. Áskerı kóliktiń ishi keń ári barlyq zaman talabyna saı jabdyqtarmen jasaqtalǵan.
«Oqý metodıkalyq jıynynyń mańyzdylyǵy úlken. Biz osynda kelip ózimizge biraz bilim aldyq. Kóp nárseni úırendik», - deıdi 5518 áskerı bóliminiń komandıri, podpolkovnık Medet Ertaılaqov.
