Abaı oblysynda ınternet sapasyn jaqsartatyn Jol kartasyna qol qoıyldy

SEMEI. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsınniń Abaı oblysyna sapary aıasynda óńirdiń eldi mekenderiniń ınternet jelisine qoljetimdilikti qamtamasyz etý jónindegi Jol kartasyna qol qoıyldy. Qol qoıý rásimine oblys ákimi Nurlan Uranhaev qatysty, dep habarlaıdy Qazaqparat tilshisi.

Osy Jol kartasyn iske asyrý sheńberinde 2027 jylǵa deıin Abaı oblysynyń eldi mekenderiniń 94 paıyzyn ınternetke sapaly keń kólemdi qoljetimdilikpen qamtamasyz etý josparlanýda.

Internetpen qamtamasyz etý, ásirese shalǵaı aýyldardyń turǵyndary úshin mańyzdy másele. Óńirde 331 eldi meken men 4 qala bar. Abaı oblysy ákiminiń apparaty júrgizgen taldaýǵa sáıkes 65% nemese 215 eldi mekende ınternet turǵyndarǵa qoljetimdi. 28% nemese 93 aýylda jeli joq.

«Osy Jol kartasy arqyly ınternet máselesin sheshýdi josparlap otyrmyz. Jergilikti ákimdiktiń qarjysyna 25 antenna dińgekti qurylǵy ornatylady. Tek qana qurylǵy qoıylmaıdy, elektr energııasy, qajetti kommýnıkatsııa tartylady» dedi Baǵdat Mýsın.

Aıta keteıik, ótken jyldyń jeltoqsan aıynda Abaı oblysynyń ákimdigi óńirdiń eldi mekenderin ınternetpen jáne baılanyspen tolyq qamtamasyz etý nemese qosylý sapasyn jaqsartý boıynsha sharalar qabyldaý úshin jumysty bastady. Tıisti mınıstrlikke «Qoljetimdi ınternet» ulttyq jobasy sheńberinde uıaly jeli sıgnalyn jáne ınternet sapasyn jaqsartý úshin talshyqty-optıkalyq baılanys jelisin salý qajet aýyldardyń tizimi jiberildi.