Abaı oblysynda halyqtyń 92 paıyzy ortalyqtandyrylǵan sýmen qamtylǵan

SEMEI. QazAqparat – Abaı oblysyndaǵy qala, aýdan turǵyndarynyń 92 paıyzy ortalyqtandyrylǵan sýmen qamtamasyz etilgen, dep habarlaıdy QazAqparat tilshisi.

Abaı oblysy ákimdiginiń málimetine súıensek, bıyl turǵyndardy aýyzsýmen qamtamasyz etý maqsatynda 13 joba júzege asyrylmaq.

«Óńirdegi ózekti máselelerdiń biri – halyqty aýyzsýmen qamtamasyz etý. Búgingi tańda oblys boıynsha azamattardyń ortalyqtandyrylǵan sý júıesine qoljetimdiligi 92 paıyzdy quraıdy. Bıylǵydan bólek 2023 jyldan taǵy 26 joba qolǵa alynady», - delingen aqparatta.

Semeı jáne Kýrchatov qalalarynda, Alakól jaǵalaýyndaǵy demalys úılerinde ekologııalyq qaýipsizdikti qamtamasyz etý maqsatynda káriz-tazartý stansalaryn qurý kózdelip otyr. Budan bólek, aımaqtaǵy elektr qýatyn arttyrý úshin Shúlbi SES kontr-rettegish qurylysy bastalmaq.

Eske salsaq, buǵan deıin Abaı oblysynda Muhtar Áýezovtiń mereıtoıyna oraı 87 shaqyrymdyq ýltramarafon ótkenin habarlaǵan edik.