Abaı oblysynda esirtki qoıyp ketýshi top qolǵa tústi
Abaı oblysy PD esirtki qylmysyna qarsy is-qımyl basqarmasy men Semeı qalasy PB esirtki qylmysyna qarsy is-qımyl bóliminiń qyzmetkerleri «Qarasora – 2023» JPІSh ótkizý barysynda sıntetıkalyq esirtkilerdi jetkizý arnasynyń jolyn kesti. Esirtki qylmysyna qarsy kúres bólinisiniń qyzmetkerleri ınternet dúkenniń qatysýshylaryn anyqtady.
18, 25 jáne 29 jastaǵy úsh jergilikti turǵyn oblys ortalyǵynda sıntetıkalyq esirtki quraldaryn qupııa oryndarǵa jasyryn qoıyp ketip otyrǵan. Ustalǵandardan satýǵa arnalǵan 250-den astam bir rettik sıntetıkalyq esirtki dozasy, sondaı-aq mobıldi qurylǵylar tárkilendi. Olardyń kómegimen jasyryn oryndardy sýretke túsirip, esep berip otyrǵan.
Mobıldi qurylǵylardy tekserý kezinde Telegram messendjerinde «kýrerler» taýar boıynsha nusqaýlar men koordınattar jazylǵan hat almasý chaty tabyldy. Taýar metall betine bekitilýi úshin ishine magnıt salyp, jabysqaq ızolentamen oraǵan.
«Saraptama kórsetkendeı, zertteýge usynylǵan zattar jalpy salmaǵy 73 gramnan asatyn A-PvP psıhotroptyq zaty ekeni anyqtaldy. Qara naryqtaǵy baǵasy 2 mln teńgeden asady», – dedi oblystyq PD bastyǵynyń orynbasary Narıman Kúldikov.
Jyl basynan beri oblys polıtseıleri zańsyz aınalymnan 200 kelige jýyq túrli esirtki zattaryn tárkiledi.
Kúdiktiler ýaqytsha ustaý ızolıatoryna qamaldy. Osy derek boıynsha QR QK-niń 297-baby 3-bóligimen sotqa deıingi tergeý júrgizilip jatyr. Onyń sanktsııasy 15 jylǵa deıingi merzimge bas bostandyǵynan aıyrý jazasyn qarastyrady.
