Abaı oblysynda eki órt sóndirý beketi ashylady

ASTANA. QazAqparat – Abaı oblysynyń Besqaraǵaı aýdanynda eki órt sóndirý beketi ashylady. Bul týraly Tótenshe jaǵdaılar mınıstri Syrym Sháriphanov oblys turǵyndarymen kezdesýinde aıtty, dep habarlaıdy QazAqparat tilshisi.

2025 jylǵa deıin óńirde osyndaı taǵy 14 beket qurý josparlanǵan.

«Qosymsha, órt sóndirý bólimsheleri joq eldi mekenderde balamaly tártipte 150-den astam erikti quralym men 50-den astam órt sóndirý beketi jumys isteıdi, olar qajetti tehnıkamen jáne órt sóndirý quraldarymen jabdyqtalǵan», - dedi mınıstr.

Aıta keteıik, Tótenshe jaǵdaılar mınıstri Syrym Sháriphanov Abaı oblysynyń halqymen kezdesý ótkizdi. Onda mınıstr jyl basynan beri Abaı oblysynyń qutqarýshylary úsh júzden astam adamdy qutqarǵanyn aıtqan edi. Bul - ótken jyldyń sáıkes kezeńimen salystyrǵanda 2,5 ese kóp. Jalpy, óńirde bes júzden astam tótenshe jaǵdaı tirkelgen.