Abaı oblysynda dala órtimen kúreste kóz jumǵan órt sóndirýshige memorıaldyq taqta qoıyldy
Byltyr qyrkúıek aıynda Jarma aýdanynyń Bozjyra aýyldyq okrýgi Birinshi aýylynyń ýchaskesinde ashyq alańda shóp janǵan. Shaqyrý ornyna №22 órt sóndirý beketiniń qyzmetkerleri jiberildi.
Shaqyrý ornyna kelgen órt sóndirýshiler dereý jalynmen kúreske kiristi. Órt sóndirý avtotsısternasy otty sóndirý úshin sý jetkizip júrgen Baqyrshyq taý-ken óndirý kásipornynyń KamAZ kóliginen sý alyp jatqan edi. Osy kezde jel baǵyty ózgerip, laýlaǵan ot avtotsısternaǵa qaraı jyljydy. Tehnıkany evakýatsııalaý joldarynyń barlyǵy jan-jaǵynan otqa oranyp ketti.
Órt sóndirýshiler órt-tehnıkalyq qarý-jaraqty jınaýdy toqtatyp, shuǵyl evakýatsııalaýǵa kiristi. Avtotsısterna men sý tasymaldaıtyn KamAZ kóligi tolyǵymen janyp ketti. Sonyń saldarynan 3 órt sóndirýshi kúıik jaraqatyn alyp, olardyń biri aýrýhanada kóz jumdy.
Marqum Aıdos Toǵyzbaev 1985 jyly 24 qarashada ShQO Maqanshy aýdany Jarbulaq aýylynda dúnıege kelgen. 2004 jyly Almaty qalasyndaǵy №5 kásiptik mektepti támamdaǵan. Azamattyq qorǵaý organdarynda 2019 jyldan beri qyzmette bolǵan.
Jarma aýdanynyń Áýezov kentinde azamattyq qorǵaý serjanty Aıdos Erulanulyna arnalǵan memorıaldyq taqta saltanatty túrde ashyldy. Taqtany ashý qurmeti Aıdostyń ákesi Erulan Toǵyzbaevqa jáne Abaı oblysy TJD bastyǵy Manarbek Shapaǵatovqa berildi. Jınalǵandar marqumdy bir mınýttyq únsizdikpen eske alyp, memorıaldyq taqtaǵa gúl shoqtaryn qoıdy.
