Abaı oblysynda bıyl jol apatynan 24 adam kóz jumdy

SEMEI. QazAqparat – Abaı oblysynda jyl basynan beri jol apatynan 24 adam kóz jumdy, dep habarlaıdy QazAqparat tilshisi.

Abaı oblystyq polıtsııa departamenti baspasóz qyzmetiniń málimetine súıensek, óńir boıynsha bıyl 145 jol-kólik oqıǵasy tirkelgen.

Sonyń saldarynan 24 adam kóz jumyp, 201 adam jaraqat aldy. Jyl basynan beri 51 jaıaý júrginshini kólik qaqty.

«Semeı qalasynda kólik qaǵyp ketken 5 jaıaý júrginshi mert bolǵan. Qaıǵyly oqıǵalardyń basty sebebi – turǵyndardyń joldy ruqsat etilmegen jerden kesip ótýi jáne kólikterdiń jyldamdyq rejımin saqtamaýy. Adamdar joldan óterde tipti aınalasyna qaramaı-aq júgirip shyǵady. Júrgizýshi kólik jyldamdyǵyn tejep úlgere almaı qalýy múmkin», - delingen aqparatta.

Eske salsaq, osyǵan deıin Shyǵys Qazaqstanda jol apatynan 3 adam zardap shekkeni habarlanǵan.