Abaı oblysynda Aıtys ortalyǵy salynbaq

SEMEI. QazAqparat – Abaı oblysynda Aıtys ortalyǵy salynady. Bul týraly óńir ákimi Nurlan Uranhaev aıtysker aqyndardy qabyldaý kezinde aıtty, dep habarlaıdy QazAqparat.

15-17 tamyz aralyǵynda Almaty qalasynda «Habar» telearnasynyń efırinde «Asyl dombyra» televızııalyq jobasy ótedi. Saıysqa Abaı oblysynyń atynan bir top aqyn qatysady. Osy oraıda, búgin oblys basshysy Nurlan Uranhaev aıtysker aqyndardy qabyldady.

Jıyn barysynda óńir ákimi Semeı qalasynda Aıtys ortalyǵyn salý máselesi keshendi josparǵa engizilgenin, bul baǵyttaǵy jumystar jalǵasyn tabatynyn jetkizdi.

N.Uranhaev saıysqa qatysýshy aqyndarǵa sáttilik tilep, «Tuǵyry bıik Tarbaǵataı» óner jáne sport festıvaliniń «Asyl dombyra - 2023» saıysynda top jarǵan aıtysker aqyn Aıbek Jeńisqazındi jeńisimen quttyqtady.

Abaı óńirin aıtys óneriniń altyn besigi deýge bolady. Bul ólkeden nebir aqyndar shyqqan. Búgingi kúni aıtys ulttyq qundylyqqa aınalyp otyr.

«Qurmetti aqyndar, bizdiń óńirimizdi aıtys óneriniń altyn besigi deýge bolady. Ulttyq ónerdi qaı zamanda bolmasyn óltirmegen, kerisinshe jańasha damýyna serpin bergen aqyndar kóptep shyqqan. Búgingi betkeustar aqyndarymyz, oblysymyzdyń namysyn qorǵap júrgen – ózderińiz. «Habar» telearnasynyń efırinen kórsetiletin «Asyl dombyra» televızııalyq jobasyna Abaı oblysynan qatysatyn sizderge sáttilik tileımin! Jeńispen oralyńyzdar!», - dedi oblys ákimi Nurlan Uranhaev.