Abaı oblysynda avtobýsqa soǵylǵan kólik júrgizýshisi kóz jumdy
Oblystyq Polıtsııa departamenti baspasóz qyzmetiniń málimetinshe, 14 tamyz kúni tańǵy saǵat 05.38-de «Toyota Land Cruiser» markaly avtokólik júrgizýshisi «Taskesken-Baqty» tasjolynan 200 metr qashyqtyqtaǵy Aqjar aýylynyń Abylaıhan dańǵylynda júrip kele jatyp, jolaýshy tasymaldap kele jatqan «VANHOOl» markaly avtobýspen soqtyǵysqan.
«Jol apaty saldarynan jeńil kólik júrgizýshisi oqıǵa ornynda qaza boldy. Avtobýs júrgizýshisi Úrjar aýdandyq aýrýhanasynyń medıtsına mekemesine jatqyzyldy», - dep habarlady vedomstvo ókilderi.
Atalǵan fakti boıynsha QR Qylmystyq Kodeksiniń 345-baby 3-bóligimen (Abaısyzda adam ólimine ákep soqtyrǵan kólik quraldaryn basqaratyn adamdardyń jol júrisi nemese kólik quralyn paıdalaný erejelerin buzýy) sotqa deıingi tergeý bastaldy. Birqatar sot saraptamasy taǵaıyndaldy. Sonyń nátıjeleri boıynsha tıisti sheshim qabyldanady.
