Abaı oblysynda altyndy zańsyz óndiretin ken oryn anyqtalyp, 13 adam ustaldy

SEMEI. QazAqparat - Abaı oblysynda quramynda altyn bar kendi zańsyz óndirý toqtatyldy. Qylmystyq toptyń músheleri ustaldy, olardyń arasynda sheteldikter de bar, – dep habarlaıdy Polisia.kz.

ІІM Uıymdasqan qylmysqa qarsy kúres departamentiniń bólimsheleri Abaı oblysy Jarma aýdanyndaǵy «Edilbaı» ýchaskesinde quramynda altyn bar materıaldy zańsyz óndirýmen, óńdeýmen, jer qoınaýyn óz betinshe paıdalanýmen jáne zańsyz kóshi-qondy uıymdastyrýmen aınalysqan qylmystyq topty ustady.

Bul fakt QR QK-niń 287-baby 3-bóligi boıynsha tirkeldi. Ótkizilgen is-sharalar barysynda Jańǵyztóbe kentinen 30 shaqyrym jerde quramynda altyn bar kendi qaıta óńdeý boıynsha 2 zańsyz tseh tabyldy. 13 «altyn izdeýshi» ustaldy, onyń ishinde 7-ýi sheteldik. Іzdeý is-sharalaryn júrgizý kezinde quramynda 100 tonna altyn bar ken, sondaı-aq 2 kılogramnan astam jarylǵysh (ammonıt) jáne ýly (synap) zattar, sondaı-aq óndirýge qajetti jabdyqtar tabylyp, tárkilendi.

Quramynda altyn bar materıaldy óndirý jáne qaıta óńdeý boıynsha «izdeýshiler brıgadasyn» jınaǵan, zańsyz tsehtardyń ıesi bolyp tabylatyn jergilikti turǵyn, qylmystyq toptyń uıymdastyrýshysy anyqtaldy.