Abaı oblysynda alqabıler qatysqan sottyń alǵashqy aıyptaý úkimi shyqty

SEMEI. QazAqparat – Abaı oblysynda alqabılerdiń qatysýymen sottyń alǵashqy aıyptaý úkimi shyqty. Adam ólimi boıynsha aıyptalýshy 15 jylǵa sottaldy, dep habarlaıdy QazAqparat.

Abaı oblysy prokýratýrasynyń baspasóz ortalyǵynan málim etkendeı, bir jyl buryn bul oqıǵa qoǵamda qyzý talqyǵa túsken. Jas kásipker, 2 balanyń ákesi Úrjar aýyly turǵynynyń qolynan qaıtys boldy. Sottalýshy avtokóliktegi jábirlenýshiden toqtaýyn talap etedi. Oǵan osy talabynyń oryndalmaýy unamaıdy.

Daýys berýshiler biraýyzdan aıyptalýshynyń buzaqylyq nıetpen, atys qarýyn qoldana otyra, kisi óltirý boıynsha kináliligi týraly sheshim shyǵardy.

19 sáýirde Abaı oblysy boıynsha mamandandyrylǵan aýdanaralyq qylmystyq ister sotynyń úkimimen Úrjar aýylynyń turǵyny 15 jylǵa bas bostandyǵynan aıyryldy. Úkim zańdy kúshine enbegen.

Eske salsaq, 2022 jylǵy 29 jeltoqsanda Memleket basshysy «Qazaqstan Respýblıkasynyń Qylmystyq-protsestik kodeksine sot alqabılerdiń qatysýymen qaraıtyn ister sanattaryn keńeıtý boıynsha ózgerister engizý týraly» Qazaqstan Respýblıkasynyń Zańyna qol qoıdy.

Jyl basynan beri asa aýyr qylmystyq isterdi sottalýshynyń ótinishi negizinde alqa bılerdiń qatysýymen qaraý qolǵa alyndy. Alqabılerge sot sheshimin qabyldaý kezinde zor jaýapkershilik júkteledi. Qarapaıym azamattar ar-ojdan men ádilettilikti ustana otyryp sheshim qabyldaıdy.