Abaı oblysynda 3 órt sóndirýshini kúıik shaldy, olardyń biri kóz jumdy

SEMEI. QazAqparat - Abaı oblysynda tabıǵı órtti sóndirý kezinde 3 órt sóndirýshi kúıik jaraqatyn alyp, olardyń biri aýrýhanada kóz jumdy. QazAqparat bul týraly QR Tótenshe jaǵdaılar mınıstrliginiń baspasóz qyzmetine silteme jasap habarlaıdy.

Málim etilgendeı, 7 qyrkúıek kúni saǵat 13.35-te «112» kezekshi pýltine Abaı oblysy Jarma aýdanynyń Bozjyra aýyldyq okrýgi Birinshi aýylynyń ýchaskesinde qurǵaq shóp janyp jatqany týraly habarlama túsken. Shaqyrý ornyna №22 órt sóndirý beketiniń qyzmetkerleri jiberilgen.

«Shaqyrý ornyna kelgen órt sóndirýshiler dereý jalynmen kúreske kiristi. Órt sóndirý avtotsısternasy otty sóndirý úshin sý jetkizip júrgen Baqyrshyq taý-ken óndirý kásipornynyń KamAZ (12 tekshe metr) kóliginen sý alyp jatqan edi. Osy kezde jel baǵyty ózgerip, laýlaǵan ot avtotsısternaǵa qaraı jyljydy. Tehnıkany evakýatsııalaý joldarynyń barlyǵy jan-jaǵynan otqa oranyp ketti. Bıiktigi eki metr qaraǵash aǵashtary janyp jatty.

Órt sóndirýshiler órt-tehnıkalyq qarý-jaraqty jınaýdy toqtatyp, shuǵyl evakýatsııalaýǵa kiristi. Avtotsısterna men sý tasymaldaıtyn KamAZ kóligi tolyǵymen janyp ketti.

Saldarynan órt sóndirý beketiniń bólimshe komandıri Amangeldi Turlybekov pen órt sóndirý beketiniń júrgizýshi-qyzmetkeri Aıdos Toǵyzbaev, órt sóndirýshi-qutqarýshy Nurlan Sálimjan túrli dárejede kúıik alyp, Jarma aýdany Shar qalalyq aýrýhanasyna jetkizildi», - delingen mınıstrlik habarlamasynda.

Serjant Aıdos Toǵyzbaev aýrýhanada kóz jumǵan. Ol qyzmettik boryshyn oryndaý kezinde kórsetken batyldyǵy men janqııarlyq erligi úshin ІІІ dárejeli «Aıbyn» memlekettik nagradasyna usynyldy. Jasy 36-da bolǵan. Azamattyq qorǵaý organdarynda 2019 jyldan bastap qyzmet etken. Artynda áıeli men 5 balasy qaldy.

«Tótenshe jaǵdaılar mınıstrligi Aıdos Toǵyzbaevtyń týǵan-týystary men jaqyndaryna qaıǵyra kóńil aıtady. Aıdos óz isiniń mamany retinde áriptesterdiń esinde máńgi qalady. TJM qaıtys bolǵan órt sóndirýshiniń otbasyna jan-jaqty kómek pen qoldaý kórsetedi. Abaı oblystyq TJD psıhologtary órt sóndirýshiniń týystaryna kómek kórsetip jatyr», - dedi mınıstrlikten.

Jalyn 500 ga aýmaqty sharpyǵan. Tilsiz jaý 8 qyrkúıek kúni saǵat 5.40-ta sóndirildi.

«Órtti sóndirýge Tótenshe jaǵdaılar departamenti men jergilikti atqarýshy organdardyń jeke quramynan 14 adam men 5 tehnıka jumyldyryldy. Qazirgi ýaqytta oqıǵanyń mán-jaıy anyqtalýda. Elimizde qyzmettik mindetterin atqarý kezinde órtke qarsy jáne qutqarý qyzmetteriniń 65 qyzmetkeri qaza boldy», - dedi QR TJM baspasóz qyzmetinen.