Abaı oblysyna bıyl 80 qandas qonys aýdardy

SEMEI. QazAqparat – Abaı oblysyna jyl basynan beri 80 qandas qonys aýdardy, dep habarlaıdy QazAqparat tilshisi.

Abaı oblysy ákimdiginiń málimetine súıensek, «Qýatty óńirler – el damýynyń draıveri» ulttyq jobasy aıasynda oblys boıynsha qandastar men qonys aýdarýshylardy qabyldaý belsendi júrýde.

«Abaı oblysy qurylǵaly 2022 jyly 302 adamǵa qonys aýdarýǵa óńirlik kvotasy bekitilip, ol tolyǵymen oryndaldy. Osy jyly qandastar men qonys aýdarýshylardy qabyldaýdyń óńirlik kvotasy – 434 adam. Búgingi tańda 80 qandas jáne 206 qonys aýdarýshylar kvotaǵa engen», - delingen aqparatta.

Ulttyq joba aıasynda qandastar jáne onyń ár otbasy múshesine memlekettik sýbsıdııa túrinde birqatar memlekettik qoldaý kórsetiledi. Naqty aıtqanda, kóship kelgende birrettik 70 AEK (241 500 teńge), turǵyn úıdi jalǵa alýǵa jáne kommýnaldyq qyzmetterge aqy tóleý shyǵystaryn jabý úshin 15-30 AEK (51 750-103 500 teńge) beriledi. Sondaı-aq turǵyn úıdi satyp alýǵa nemese baspana qurylysyna 4 mln teńge kóleminde sertıfıkat qarastyrylǵan.

Eske salsaq, osyǵan deıin Abaı oblysynda jeke kásibin bastaǵysy keletin kópbalaly otbasylarǵa 70 grant beriletindigin habarlaǵan edik.