Eger atyńyzǵa alaıaqtyq kredıt resimdelse, ne isteý kerek

ASTANA. KAZINFORM — Eger alaıaqtar sizdiń atyńyzǵa nesıe rásimdese ne isteý kerek, kelesi qadam qandaı bolmaq? Bul týraly Qarjy naryǵyn retteý jáne damytý agenttigi málim etti.

Agenttik qadam-qadamymen kelesideı nusqaýlyq usyndy: 

1. Dereý bankke nemese mıkroqarjy uıymyna habarlańyz

Kredıttiń alaıaqtyq jolmen resimdelgenin aıtyp kredıtorǵa qońyraý shalyńyz nemese jazyńyz. Mynalardy:

• kartany, shotty jáne qosymshany buǵattaýdy;
• júginý faktisin tirkeýdi talap etińiz

 

2. Polıtsııaǵa habarlasyńyz 

Polıtsııaǵa ótinish berińiz (eGov, eOtinish nemese jeke baryp). Banktiń/MQU-nyń kúnin, somasyn jáne ataýyn kórsetińiz. Barlyq dáleldemeni (SMS, alaıaqtar qońyraý shalǵan nómirlerdiń skrınshottary, hat-habarlar, úzindi-kóshirmeler) qosa berińiz.

3. Protsestik qujatty alyńyz
   
   Polıtsııa:

• jábirlenýshi dep taný týraly qaýlyny (QPK-niń 71-baby), nemese
• qylmysqa yqpal etken mán-jaılardy joıý jónindegi sharalar qabyldaý týraly usynýdy (QPK-niń 200-baby) berýge tıis, qujat tikeleı kredıtorǵa jiberiledi.

Bul qujat kredıtordyń paıyzdy (aıypaqyny) esepteýin jáne qaryzdy óndirip alýyn toqtata turý úshin qajet.

4. Esepteýlerdiń toqtatyla turǵanyn tekserińiz

Kredıtor polıtsııa qujatyn alǵannan keıin kúntizbelik 3 kún ishinde:

• paıyzdy jáne aıypaqyny (ósimpul, aıyppul) esepteýdi toqtatýǵa;
• bereshekti óndirip alýdy jáne talap-aryz jumysyn toqtata turýǵa mindetti.

 

5. Eger kredıtor 4-tarmaqta kózdelgen sharalardy qabyldaýdan bas tartsa, QR Qarjy naryǵyn retteý jáne damytý agenttigine shaǵym qaldyryńyz. 

Banktiń/MQU-nyń bas tartýyn jáne polıtsııanyń protsestik qujatyn tirkep, shaǵymdy eOtinish portaly arqyly jiberińiz.

6. Bereshekti negizder bolǵan jaǵdaıda ǵana esepten shyǵarýǵa bolady 

Alaıaqtyq kredıtti esepten shyǵarý avtomatty túrde bolmaıdy.

Bul bank/MQU tarapynan buzýshylyqtardyń rastalǵan faktileri, sondaı-aq polıtsııa men sottyń qujattary bolǵan jaǵdaıda ǵana múmkin bolady.

• Sottan tys (sotsyz) esepten shyǵarýǵa negizdeme

Eger bank nemese MQU mindetti talaptardy buzsa jáne polıtsııa alaıaqtyq faktisin rastasa:

Qandaı buzýshylyqtar mańyzdy bolyp sanalady:

1) onlaın-kredıtti resimdeý kezinde bıometrııalyq ıdentıfıkattaý joq;

2) kredıt klıenttiń qaryz alýdan erikti túrde bas tartqany týraly belgi qoıylǵan kezde beriledi;

• kredıt berýdiń jas shekteýleri buzylǵan (kredıtor bólimshesinde jeke ózi bolǵan kezde resimdelgen kredıtti alýǵa olardyń kelisiminsiz 21 jasqa tolmaǵan nemese 55 jastan asqan adamǵa kredıt berilgen, ne eGov portaly, kredıttik bıýro nemese elektrondyq úkimetpen yqpaldastyrylǵan kredıtor júıeleri arqyly onlaın rejıminde);
• bankte 150 AEK-ten joǵary somaǵa jáne MQU-da 75 AEK-ke alǵashqy tutynýshylyq kepilsiz onlaın kredıt berý júzege asyryldy;
• «sheshim qabyldaý kezeńi» saqtalmaǵan — aqsha belgilengen ýaqyttan buryn berilgen:

— 150-den 255 AEK-ke deıingi somaǵa banktik qaryz sharty jasalǵannan keıin jáne qaryz alýshynyń kelisimin almaı, 8 saǵat buryn,

— 255 AEK-ten joǵary somaǵa — 24 saǵat buryn;

— 75 AEK-ten astam somaǵa mıkrokredıt 24 saǵat buryn.

Kórsetilgen shekteýler, eger klıent bir kún ishinde birneshe onlaın-kredıt resimdese de qoldanylady.

Erekshelikter: kredıt taýarǵa, qyzmetke nemese jumysqa aqy tóleý úshin beriledi jáne tikeleı satýshyǵa tólenedi nemese eger kredıt boıynsha bereshekti sol bankte nemese mıkroqarjy uıymynda, sondaı-aq tólem kartasy boıynsha belgilengen lımıt sheginde 150 AEK deıin óteý kózdelse).

Qandaı qujattar qajet:

1) sizdi jábirlenýshi dep taný týraly polıtsııa qaýlysy (QPK-niń 71-baby), nemese

2) alaıaqtyq mán-jaılaryn joıý jóninde sharalar qabyldaý týraly polıtsııanyń usynysy (QPK-niń 200-baby).

Kredıtor ne isteıdi:

Kredıttiń kórsetilgen buzýshylyqtarmen berilý faktisi anyqtalǵan kúnnen bastap 3 jumys kúni ishinde jáne quqyq qorǵaý organdarynyń protsestik qujattary bolǵan kezde bereshekti esepten shyǵarady, kredıttik tarıhqa ózgerister engizedi jáne ustalǵan somany qaıtarady.

• Sot arqyly esepten shyǵarý (sottyń sheshimi boıynsha) negizderi

Eger bank/MQU tarapynan buzýshylyqtyń jasalǵany aıqyn bolmasa, biraq polıtsııanyń tergep-tekserýi alaıaqtyq faktisin rastasa.

Ne bolady:

• Polıtsııa dálelder bazasyn jınaıdy jáne materıaldardy sotqa tapsyrady;
• sot kredıttiń alaıaqtyq jolmen resimdelý faktisin belgileıdi jáne onyń bank/MQU jasaǵan buzýshylyqtardyń saldarynan bolǵanyn rastaıdy.

Banktiń/MQU-nyń negizgi buzýshylyqtary:

• úshinshi tulǵanyń klıenttiń ıdentıfıkattaý derekterin zańsyz alýy jáne paıdalanýy (qurylǵylardy qashyqtan basqarýdy qosa alǵanda);
• bıometrııalyq ıdentıfıkattaýdyń buzylýy;
• alaıaqtyq belgilerin anyqtaý jáne tirkeý jónindegi talaptardy saqtamaý.

Sot sheshimi zańdy kúshine engennen keıin ne bolady?

Kredıtor 10 jumys kúninen keshiktirmeı:

1. mundaı kredıt boıynsha bereshekti esepten shyǵarýǵa;
2. klıentke ustalǵan nemese tólengen somany qaıtarýǵa;
3. kredıttik tarıhy jańartýǵa mindetti.

Bilý mańyzdy:

• Polıtsııanyń protsestik qujatynsyz nemese sot sheshiminsiz bank/MQU kredıtti esepten shyǵara almaıdy.
• Esepten shyǵarý qoldanystaǵy zańnama sheginde banktiń/MQU-nyń belgilengen buzýshylyqtary jaǵdaıynda ǵana júrgiziledi.
• Bank/MQU talapty oryndaýdan bas tartqan kezde QR Qarjy naryǵyn retteý jáne damytý agenttigine eOtinish portaly arqyly shaǵym berińiz.

Eske sala keteıik, buǵan deıin elde kepilsiz tutynýshylyq qaryz berýge shekteý engiziletinin jazǵan edik.